عمران خان پاکستان ءِ بھسکاری نا دنگ آ ایس سرکرے، سعد رفیق

لاہور۔ 17 مارچ (اے پی پی) بنجائی وزیر ہوابازی و ریلوائی خواجہ سعد رفیق پارینے کہ عمران خان پاکستان ءِ بھسکاری نا دنگ آ ایس سرکرے، عدالت اٹی حاضر مفننگ نا سوب آن عمران خان نا ناقابل ضمانت وارنٹ دزگیری جاری مس، ریاست نابرخلاف ہنوک آتا برخلاف کارروائی مریک۔ داخیال آتا درشانی ءِ او جمعہ نادے آ داڑے ماڈل ٹاؤن اٹی پریس کانفرنس آن تران کرسا کرے۔ بنجائی وزیر خواجہ سعد رفیق پارے کہ عمران خان ءِ کیہی وار عدالت آک بٹنگار ولے او حاضر متو ، جوان ءِ عمران خان جوان و سیاسی وڑاٹ کانود نا مون آ سرتسلیم کے، اونا برخلاف کانود نا رداٹ کارروائی مننگ اٹی ءِ۔ اوپارے کہ مقدمہ غاتا فیصلہ عدالت آتے کروئی  مریک، ہنداسوب آن عمران خان عدالت آتیٹی تینا برخلاف مقدمہ غاتون مون ایتے، عمران خان حکومتی ادارہ غاتا برخلاف لس شاری تے ایس سلفے۔ خواجہ سعد رفیق پارے کہ مسلم لیگ (ن) نا سینئر راہشون ہڑدے ئی بنداو آ عدالت آتیٹی پیش مرسا کرے و مسلم لیگ (ن) نا سینئر سرکڑدہ غاتے ہڑدے احتساب عدالت اٹی پیش کننگاکہ و دروغ و بے بنداو مقدمہ غاتون مون تس، مسلم لیگ (ن) وخت اس کہ سرکاری کارندہ غاتیا خل خو کتو۔ اوپارے کہ مسلم لیگ (ن) مدام آئین نا بالادستی کن جنگ تسنے، محمد نواز شریف تینا اُرائی کلثوم نواز ءِ بستر مرگ آ ہلسا دزگیری تننگ کن سرمس۔ اوپارے کہ عمران خان جتھ آتا سیاست ءِ رواج کرینے، پی ٹی آئی نا کارندہ غاک جتھ آتا کمک اٹ عدالت آتیا چڑھائی کریر، سرکاری ملکیت آتے نسخان تسر و گاڈی تے خاخر تسر ، عدالت آتیان اختلاف رائے مننگ کیک ولے چڑھائی مننگ کپک، عمران خان ءِ انتس کروئی ءِ کے عدالت آ ہنوئی تمک۔ بنجائی وزیر پارے کہ یاسمین راشد نا گپ وتران آ ہچ ءُ ایکشن اس ہلنگتو، گلگت پولیس لاہور اٹی غیرکانودی کڑد ادا کرینے، پنی مننگ نا مش آ لگوک آک مدام شیف تمرہ۔