چاگڑدی بدلی و اوفتا اثرآتا سوب آن رونما مروک آ آفت آتا شدت ننے آن اجتماعی گام گیج آتا خواست کیک، سینیٹر شیری رحمان

اسلام آباد۔ 17 مارچ (اے پی پی) بنجائی وزیر چاگڑدی بدلی سینیٹر شیری رحمان  پارینے کہ چاگڑدی بدلی تا رفتار و اوفتا اثرآتا سوب آن رونما مروک آ آفت آتا شدت ننے آن اجتماعی گام گیج آتا خواست کیک انتئے کہ دا بھلا جہانی چیلنج نا مقابلہ ءِ کننگ تنیا ملک یا ڈیہہ سے کن ممکن اف، دارداٹ دنیا نا ملک آک و جہانی ادارہ غاتے اواری اٹ معقول ایسر اس پٹوئی مریک۔ جمعہ نادے آ داڑے جہانی بینک انا کنڈآن ’’ملکی چاگڑدی و شونداری رپورٹ‘‘ نا جاری کننگ نا وخت آ تران کرسا اوپارے کہ نن ساڑی آ وخت اٹی نوکاپ و چاگڑدی بدلی نا ایلو واقعہ غاتیان ودی مروک آ انسانی تنکی ءِ خنانن، موسمیاتی بدلی پاکستان اٹی بھلو اثر اس مرتب کرینے و ساڑی آ نوکاپ نا سوب آن بھلا نسخان آتون مون تروئی تمانے، ننے تدوک آ سال انا چاگڑدی آفت آتیان بھاز انگا سبخ آتے ہیل کننگ نا گرج ءِ۔ داوخت آ او حکومت پاکستان نا کنڈآن ملک اٹی نوکاپ زہمی تا امداد و بحالی نا گام گیج، چاگڑد نا رکھ ومون آ دننگ نا ڈٹ آتے ہم تالان کرے۔ بنجائی وزیر پارے کہ اینو نا دور اٹی چاگڑدی بدلی و شونداری دنیا نا اسہ اسیجائی ءُ ویل اسے، چاگڑد نا نظام ڈٹ آتیان زیات ترندی اٹ  بدل مننگ ءِ۔ اوپارے کہ موسمیاتی بدلی تا سوب جوڑ مروک آ جہانی اخراج اٹی بھاز بھلو کچ اسے آ ودکی مننگ ءِ، داحالیت ننے آن اجتماعی گام گیج آتا خواست کیک انتئے کہ چاگڑدی بدلی نا مقابلہ ءِ کننگ تنیا اسہ ملک یا ڈیہہ سے کن ممکن اف، چاگڑدی بدلی تا مقابلہ ءِ کننگ کن جہانی ادارہ و غٹ ملک آتے اواری اٹ معقول ایسر اس پٹوئی مریک۔ شیری رحمان پارے کہ بنجائی وزارت چاگڑدی بدلی نا کڑد قومی پالیسی فراوان کننگ ءِ، صوبہ غاتے دا بابت تینا گرج انا رداٹ تینٹ کانود جوڑ کننگ نا گرج ءِ۔ اوپارے کہ پاکستان ءِ اسہ مالیاتی رداٹ مشکل حالیت مون تروک ءِ ، چاگڑدی بدلی نا مالی باندات آتون مون تننگ کن جہانی بینک نا اہم ءُ کڑ داسے۔ شیری رحمان پارے کہ پاکستان ءِ کلائمیٹ ایڈاپٹیشن و منیگیشن کن 2030 اسکان 348 بلین ڈالر نا گرج ءِ، چاگڑدی بدلی تا سوب جوڑ مروک آ جہانی اخراج اٹی ننا بشخ مفننگ نا بربیر ءِ ولے نن داڑآن غٹ آن زیات زہمی ملک آتیان اسٹ اُن۔