حکومت توانائی نا چندی ڈٹ آتیاکاریم کننگ ئِ ، توانائی نا ڈٹ آتیان مرحلہ وار پیداوار نا بناءمریک، پاک چین اقتصادی راہداری نا رداٹ بجلی و توانائی نا کیہی ڈٹ آک پورو مریرہ، وزیر واپار خرم دستگیر خان نا انٹرویو

اسلام آباد۔ 20مئی (اے پی پی) وزیر واپار خرم دستگیر خان پارینے کہ ملک اٹی توانائی نا کاختی نا مون ئِ توننگ کن حکومت توانائی نا چندی ڈٹ آتیا کاریم کننگ ئِ۔ ہفتہ نا دے تینا اسہ انٹرویو اسے ٹی او پارے کہ پاکستان مسلم لیگ (ن) نا حکومت اقتدار ئِ سنبھالنگ تون بجلی و توانائی نا ڈٹ آتیا تینا چکار ئِ تخا و دارداٹ عملی گام گیج آتا بنائِ کرے۔ توانائی نا کیہی ڈٹ آتیا کاریم نا بناکننگا۔ اوپارے کہ ساہیوال کول پاور پلانٹ آن پیداوار نا بناءمسنے، توانائی نا چندی زیر تکمیل ڈٹ آتیان مرحلہ وار پیداوار نا بناءمریک۔ خرم دستگیر خان پارے کہ حکومت چنکو وخت اسے ٹی 17000 میگاواٹ نا ہدف ئِ دوئی کرینے۔ اسہ سوج اسے نا ورندی ٹی اوپارے کہ مچ آ ملک اٹی شیڈول نا رداٹ لوڈشیڈنگ مننگ ئِ ولے صنعتی بشخ داڑآن مستثنیٰ ئِ، بدقسمتی اٹ مستین اٹی لوڈشیڈنگ نا ویل اتون مون تننگ کن عملی گام گیج کننگ تو ہرانا سوب دا ویل ودی مس ولے ساڑی حکومت دا ویل انا ایسری کن سنجیدہ کوشست کننگ ئِ۔ اوپارے کہ پاک چین اقتصادی راہداری نا رداٹ توانائی نا کیہی ڈٹ آک پورو مریرہ، داڈٹ آتارداٹ توانائی نا چندی ڈٹ آتیٹی بھلو زرکاری اس مننگ ئِ ہرانا ملکی معیشت آ بے کچ مثبت زئم تمک۔