وارسک۔ 20مئی (اے پی پی) وزیر داخلہ چوہدری نثارعلی خان پارینے کہ ہراڑے اختلاف، نزوری و ابہام ساڑی مف تو اودے بایدے پٹنگپ۔ ہفتہ نا دے وارسک اٹی ایف سی نا پاسنگ آﺅٹ پریڈ اٹی مہمان خصوصی نا وڑاٹ شرکت آن پد صحافی تتون ہیت وگپ کرسا اوپارے کہ کلبھوشن یادیو نا بابت ہچ وڑنا ہچ ئُ ابہام اس اف و او درملکی ایجنٹ و جاسوس اسے ہرا پاکستان اٹی بھاز انگا دہشت گردکارروائی تا مرتکب ئِ و اگہ وخت آ ہلنگ توکہ تو پین تباہی تا مرتکب مسکہ۔ اوپارے کہ پاکستان تینا کانود نا رداٹ مچ آ معاملہ ئِ ہینڈل کرینے و داٹی ہچ ئُ شک و اختلاف اس اف۔ اوپارے کہ اوغانستان کن پاکستان نا الس نا قربانی تا مرغن ئُ تاریخ اس ساڑی ئِ و ہڑتوم آ ملک آتا الس نا است آک یکجا دھڑکرہ۔ اوغان حکومت نا پالیسی نا بارواٹی اوپارے کہ ای داڑآ خیال آتا درشانی ئِ کننگ خواپرہ ولے پاکستان نا پالیسی بھاز متفقہ و صفا ئِ کہ پاکستان ہچ ئُ دُن ئُ پالیسی اسے تون تفنگ نا سجفپک ہرا اوغانستان نا آجوئی، وت واجہی و امن اٹی خلل شاغے۔ اوپارے کہ اوغانستان اٹی امن پاکستان اٹی امن نا بریبر ئِ۔ اوپارے کہ اوغان حکومت تنقید کننگ آن بیدس تینا نزوری تے مر کننگ آ چکارتخے و دشمن نا بولی ٹی ہیت کپ۔
