سینیٹ جمہوریت نا سوگوی، انصاف و بریبری نا مون آ دننگ کن اہم ءُ کڑد اس ادا کرینے، چیئرمین سینیٹ صادق سنجرانی

اسلام آباد۔16 مارچ (اے پی پی)چیئرمین سینیٹ صادق سنجرانی پارینے کہ پاکستان نا پنجا سال انا پارلیمانی و سیاسی تاریخ اٹی سینیٹ آف پاکستان نا کڑد اہم ءِ، جمہوریت نا سوگوی ، انصاف و بریبری نا مون آ دننگ کن اہم ءُ کڑد اس ادا کرینے۔ پنچ شنبے نادے آ چیئرمین سینیٹ صادق سنجرانی خصوصی سیشن نا ارٹ میکو دے دیوان اٹی شریک غٹ سینیٹر و مہمان تے بخیر اٹ پارسا پارے کہ اینو نا 50 سال انا گولڈن جوبلی دود آتیٹی داڑے ساڑی مننگ ننا غٹ اکن شرفمندی اسے۔ 50 سال اٹی سینیٹ آف پاکستان نا سیاسی تاریخ اٹی اہم ءُ کڑد اس ادا کرینے۔ سینیٹ پاکستان نا بنجائی اکائی تا توار ءِ بڑز کننگ و اوفتا فائدہ غاتا بڑزکو کہول آ ترجمانی ءِ کرینے۔ پاکستان اٹی جمہوریت نا سوگوی و انصاف و بریبری نا قدر انا مون آ دننگ کن سینیٹ نمان کڑد ادا کرینے۔ نن دا عزم انا درشانی ءِ کینہ کہ تینا اصول آتیا سلنہ ہرا سال آتیان راہشونی کرسا بننگ ءُ۔ اوپارے کہ نن تینا ہنین آ وطن و اونا الس نا گچینی کن کاریم ءِ برجاتخنہ۔ سینیٹ علاقائی و جہانی کمکاری نا مون آ دننگ کن ہم اہم ءُ کڑد اس تخک۔ پاکستان نا خارجہ پالیسی و جہانی تعلقداری تے سوگو کننگ کن گچین پارلیمانی سفارتکاری نا مننگ سینیٹ نا خاص ءِ۔ دا کوشست آتا سوب آن دنیا ٹی پاکستان نا ساکھ گچین مس۔ سینیٹ نا گچین کوشست آتیان بین الپارلیمانی یونین نا یوگنڈا دیوان اٹی چاگڑدی بدلی تیان زہمی ملک آتیکن فنڈ ٹہیفنگ ءِ ایجنڈاٹی اوار کننگا۔ سینیٹ اولیکو پارلیمانی چیمبر ءِ ہراتینا رپورٹ ءِ آءی پی یو ءِ پیش کرے۔ اودیوان اٹی بروک آ غٹ سفارت آتے بخیر کرے۔