جمہوری نظام نا سوگوی، کانود نا حکمرانی و آئین نا بالادستی کن سینیٹ آف پاکستان تینا کڑد ءِ ادا کرسا کیک

اسلام آباد۔ 16 مارچ (اے پی پی) وزیرکانود اعظم نذیر تارڑ پارینے کہ پاکستان اٹی جمہوری نظام نا سوگوی، کانود نا حکمرانی و آئین نا بالادستی کن سینیٹ آف پاکستان تینا کڑد ءِ ادا کرسا کیک، دنیا چاگڑدی کچٹی ٹی پاکستان نا اسہ درسد اس ہم کڑد مفننگ آن پد ہم اونا زہمی مننگ نا درک ءِ خلے و پاکستان تون سلے۔ پنچ شنبے نادے آ وزیر کانود سینیٹ نا گولڈن جوبلی دود آتا اڈتننگ آ مبارکبادی ترسا پارے کہ دا دود آتا وخت آ راج انا چندی تپہ غاتا نمائندہ غاتا گپ وتران ءِ بِننگ نا موقع رسینگانے۔ پنی آ کاروباری شخصیت، پنی آ وکیل و کہنہ مشق صحافی تا گپ وتران ءِ بِننگ نا موقع دُوبس۔ داایوان ءِ کمیٹی آف دی ہول اٹی بدل کننگ نا تصور گچین ئس و غٹ مہمان تے داڑے تینا خیال آتا درشانی نا موقع تننگ اہم ءُ گام اسے۔ داکان مست ہرافک داڑے شریک مسر او بھاز پرجوش ئسر۔ چیئرمین سینیٹ غٹ ءِ ملنگ و تولنگ نا موقع تس کہ او داڑے اوار تولسا سینیٹ آف پاکستان نا 50 سال انا تاریخ نا جاچ ءِ ہلیر و بطور قوم داڑے ہراویل مون تروک ءِ اوفتیا شرہ کے۔ اوپارے کہ پاکستان اٹی جمہوری نظام نا سوگوی ، کانود نا حکمرانی، آئین نا بالادستی کن تینا کڑد ءِ ادا کرسا کیک۔ سینیٹ نا کڑد جہانی فورم تیا نمان مسنے، تینا نکتہ نظر ءِ بیان کرے۔ اوپارے کہ جہانی برادری نا اسلام آباد اٹی ساڑی سفارتکار آتا اسہ بھلو کچ اس داڑے ساڑی ءِ اوفتا ساڑی گری نا فائدہ ءِ ہرفسا ای جہانی کہول آ چاگڑدی بدلی نا چیلنج آتا ذکر ءِ کیوہ۔ تدوک آ باسنی تیٹی پاکستان نا چندی علاقہ غاتیٹی دا سوب آن نوکاپ بس۔ ای جہانی کہول آ دا باندات آتے گیشتری اٹ اکثر ہرفسا کریٹ۔ پاکستان نا جہانی کچٹی ٹی اسہ درسد ہم بشخ اف ولے نن  اونا بھلو قیمت اس تسونن۔ نن جہانی برادری آن خواست کینہ کہ او مون آ برے و تینا کڑد ءِ ادا کے و پاکستان تون سلے۔ ننے غٹ ءِ پاکستان تون سلوئی مریک۔ پاکستان کن دا مشکل وخت اسے پاکستان نا الس و مملکت پاکستان نا گچینی کن نن غٹ اوار سلوک اُن۔