یورپی یونین پاکستان نا اسہ بھلا کاروباری شریدار ءِ، پارلیمانی ادارہ غاتون کمکاری برجاسلک، سفیر یورپی یونین

اسلام آباد۔ 16 مارچ (اے پی پی) یورپی یونین نا سفیر ڈاکٹر ریناکوئنکا پارینے کہ یورپی یونین پاکستان نا اسہ بھلا کاروباری شریدار ءِ، بنجائی و صوبائی کہول آ پارلیمانی ادارہ غاتون کمکاری برجاسلک، اومیت ءِ کہ پاکستان اٹی برجاسال کانود نا حکمرانی ، انسانی حق و میڈیا نا آجوئی تون اوار جمہوری عمل پورو مریک۔ پنچ شنبے نادے آ سینیٹ نا 50 سال انا دود آتا ارٹ میکو دے کمیٹی آف دی ہول آن تران کرسا اوپارےکہ گچین مروک آ مخلوق الس نا واک انا ڈیک ءِ ایترہ۔ او گڈ گورننس و کانود نا حکمرانی نا زموار مریرہ۔ دا گچین مروک آ نمائندہ غاک تینا عدلیہ نا مون آ جوابدہ مریرہ۔ دا اصول ہراڑے الس کن اصول وضع کیک ہموڑے پارلیمان کن ہم اصول اس وضع کیک۔ یورپی یونین اٹ جمہوریت نا بھلوکچ اسے۔ ہموڑے سینیٹ نا باسک و یونین نا کہول آ پدریسہ اٹ گچین کاری مریک۔ ساڑی آ یورپی یونین نا گچین کاری دنیا ٹی ارٹ میکو بھلا جمہوری مشق ءِ۔ پارلیمان اسہ ہندن ءُ فورم اسے ہراڑے قومی ویل آتیا شرہ کننگک۔ پارلیمان چیک اینڈ بیلنس نا کمک اٹ حکومت ءِ جوابدہ تخک و کانود سازی ٹی چرجوئی نا ضمانت ءِ۔ پاکستان و یورپی یونین نا 60 سالہ تعلقداری ءِ۔ 2014 آن پاکستان جی ایس پی پلس آن فائدہ ہرفنگ ءِ و 80 درسد پاکستان نا برآمد یورپی یونین اٹ مفت بریک۔ یورپی یونین پاکستان نا اسہ بھلو کاروباری شریدار اسے۔ یورپی یونین گڈ گورننس نا مون آ دننگ کن کمکاری ءِ برجاتخک۔ نن بنجائی و صوبائی کہول آ پارلیمانی ادارہ غاتون کمک کرسا کینہ۔ یورپی یونین ءِ اومیت ءِ کہ پاکستان اٹ داسال آئین نا رداٹ کانود نا حکمرانی ، انسانی حق ومیڈیا نا آجوئی تون اوار جمہوری عمل نا پوروی مریک۔