بنجائی وزیر توانائی انجینئر خرم دستگیر خان نا پریس کانفرنس

اسلام آباد۔ 15 مارچ (اے پی پی) بنجائی وزیر توانائی انجینئر خرم دستگیر خان پارینے کہ برجاسال تیرمہ نا موسم اٹی لوڈشیڈنگ تدوک آ سال انا مقابلہ ٹی کم مریک، گوادر اٹی بجلی نا بھلو و آخبتی فراوانی نا متکن آ ویل ءِ ایسر کننگانے ہرانا سوب آن ایران تون مروک آ معاہدہ نا رداٹ 100 میگاوا ٹ بجلی گوادر ءِ ملک، تھرکول پروجیکٹ سسٹم آن 2000 میگاواٹ بجلی نا بے سلنگ آن فراوانی کن ٹرانسمیشن لائن آ کاریم برجاءِ ہرادے موسم گرما نا بننگ آن مست پورو کننگک، مانسہرہ ٹی پاکستان نا غٹ آن بھلا 765 کے وی نا گریڈ اسٹیشن اس تفنگک ہرانا سوب آن داسو و دیامیر بھاشا ڈیم آن ودی مروک آ بجلی ملک انا سسٹم اٹی اوار کننگک۔ داخیال آتا درشانی ءِ چارشنبے نادے آ پریس کانفرنس آن تران کرسا کرے۔ بنجائی وزیر پارے کہ گوادر اٹی رہینگوک آتیکن بجلی نا بھلو و آخبتی فراوانی نا ویل ءِ ایسر کرینن ، تدوک آ سال جون اٹی ایران تون 100 میگاواٹ بجلی نا معاہدہ کننگاسس، تدوک آ تُو پاکستان تینا کنڈآن 20 کلومیٹر نا ٹرانسمیشن لائن نا کاریم ءِ پورو کرینے وخت اس کہ ایران نا کنڈآن ہم دا کاریم ءِ پورو کننگانے۔ ہنداسوب آن ٹیکنیکل وڑاٹ لائن تیار ءِ ، بجلی نا فراوانی نا گڈیکو معاہدہ 2 دے مست تہران اٹی تین پہ تینی رضامندی نا رداٹ پورو کننگا، دا ڈٹ انا رداٹ ہموجاگہ نا رہینگوک آتیکن شونہال و روزگار دوبریک گوادر بندرگاہ ، بالی پٹ و دیر انا پلانٹ کن بجلی نا معقول مقدار 24 گھنٹہ دستیاب مریک ہراکہ گوادر اٹی بروک آ شونداری کن ستاکڑزوک ءُ ہیت اسے۔