اسلام آباد۔ 14 مارچ (اے پی پی) پاکستان مسلم لیگ (ن) نا راہشون سینیٹر عرفان صدیقی پارینے کہ 2017 ء ٹی نواز شریف نا پاکستان ءِ اینو نا پاکستان ءِ مون آ تخسا فیصلہ کے کہ اینو ملک انا زرگزرانی حالیت انت اکن خراب ءِ، کس اس تو دانا زموار ءِ؟ سے شنبے نادے آنجی ٹی وی چینل نا پروگرام اٹی گپ وتران کرسا اوپارے کہ توشہ خانہ نا سرجم مون آ بسنے و ہچ ءُ ہیت اسے ڈکھنگ تنے، ہندادے شفافیت پارہ، گڑاسے نا جاچ ءِ ہلنگ کن اخلاقی پلو اتون اوار اوار اسہ کانودی پلو اس مریک ، اگہ کس اس پیشن نا ملک آن ٹیکی اس ہلکنے ، بیست درسد یا پنجا درسد ادائیگی آ دا ٹیکی ءِ تخنگ مریک، دا باندات اٹی کانود دزگیر کننگ کپک، دانا نہاد نا تعین ءِ کننگ کن اسہ نظام اس جوڑ ءِ۔ او پارے کہ توشہ خانہ غان ٹیکی ہلنگ کن لوز ’’Retain‘‘ ءِ ، داڑکن درخواست تروئی تمک کہ دا ٹیکی ءِ ای تخنگ خواوہ، دا ٹیکی ءِ بہاکننگ اسُل غیرکانودی ءِ و داڑا غٹ کانوددانک متفق ءُ۔ اوپارے کہ سیاست دانک ٹیکی ہلکر، نہاد ءِ تسر ، تینا میرات آتیٹی اوفتے ظاہر کریر ولے عمران خان نا ہچ ءُ سما اف کہ او ہراتم ٹیکی ہلک، ہراتم ادائیگی کرے ، کس اس تپک، توشہ خانہ غان ہلوک آ گڑاتے او اِراسال اسکان میرات آتیٹی ظاہر اسکان کتو۔ اوپارے کہ ہراتم کس اسے تون زر بریک تو اونا زمواری ءِ کہ اواوفتے میرات آتیٹی پاش کے، عرفان صدیقی پارے کہ بھاز انگا ادارہ و شخصیت آک ہندن ءُ ہرافتیان اَرفنگ پننگک۔ اگہ دا نظام ءِ سہی کروئی ءِ تو ولدا غٹ ءِ اسہ کہول آ اتوئی مریک۔ اوپارے کہ توشہ خانہ نا ٹیکی تا بابت پیشن نا ملک آتا کانود ءِ ہُننگ مریک، اسلامی نظریاتی کونسل ءِ دا باندات ءِ گدریفنگے کہ ہراٹیکیک ریاست ءِ ملرہ او بیت المال انا بشخ مریرہ و اوفک ہراوڑ کاریم اٹ اتنگر۔ اسہ سوج اسے آ سینیٹر عرفان صدیقی پارے کہ نواز شریف نا بارواٹی کنفرم ءِ کہ او زوت پاکستان آ بننگ اٹی ءِ، تاریخ آتا تعین داسکان متنے۔
