اسلام آباد۔ 13 مارچ (اے پی پی) وزیراعظم محمد شہباز شریف کرپاس نا کشارگر آتیکن بھلو فیصلہ اس کرسا کرپاس نا برجاسال نہاد ءِ 8500 روپئی فی من (40کلو) مقرر کننگ نا اصولی منظوری ءِ تسنے وخت اس کہ وزیراعظم پارت کرینے کہ کرپاس نا سپورٹ پرائس زوت آن زوت اقتصادی رابطہ کمیٹی آن منظور کرفنگ کن پیش کننگے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی کشاری ٹاسک فورس انا جاچ دیوان اس اڈ ہلک ہراٹی کرپاس نا پیدوار ءِ ودفنگ و کرپاس نا سپورٹ پرائس مقرر کننگ آ سرجم گپ وتران مس۔ دیوان اٹی بنجائی وزیر اسحاق ڈار، سید نوید قمر ، طارق بشیر چیمہ، نگران وزیراعلیٰ پنجاب سید محسن رضانقوی، سلاہکار وزیراعظم احد چیمہ و تعلقدار بڑزکو کمامدارآک بشخ ہلکر۔ دیوان ءِ پاننگاکہ تدوک آ سال نوکاپ، پِر ، نہری دیر انا کاختی و کھد انا تنکی نا سوب آن کرپاس نا پیدوار اٹی خاطرخواہ کمتی واقع مس۔ برجاسال کرپاس نا جم پیدوار نا کساس ءِ 12.77 ملین بیلز خلنگانے، وخت اس کہ کرپاس نا سپورٹ پرائس و حکومت نا گام گیج آتا سوب آن نئے بیرہ کرپاس نا دسنگ نا رقبہ بلکن فی ایکڑ پیدوار اٹی خاطرخواہ ودکی گمانی ءِ۔ دیوان اٹی کرپاس نا فی ایکڑ خڑچ و اونا ایلو فصل آتون موازنہ ہم پیش کننگا۔ داوخت آ وزیراعظم پارت کرے کہ صوبائی حکومت آک بزغر آتے کرپاس نا مقرر کروک نہاد نا فراوانی ءِ پک کیر۔ بنجائی حکومت مقرر کروک سپورٹ پرائس آ عملدرآمد کن صوبائی حکومت آتا ہرممکن کمک ءِ کیک۔ وزیراعظم پارے کہ حکومت کرپاس نا فی ایکڑ پیدوار اٹی ودکی کن اولیتی بنداو تیا گام گیج کننگ اٹی ءِ۔ کرپاس نا فصل انا فی ایکڑ پیدوار ءِ ودفنگ کن سلاہ تننگ اٹ وزارت نیشنل فوڈ سیکورٹی ترند رفتاری اٹ تینا کاریم ءِ پورو کے۔ کرپاس پاکستان نا زرمبادلہ کٹیا کروک آ فصل ءِ۔ وزیراعظم پارے کہ کرپاس ننا ٹیکسٹائل نا صنعت نا تمبہ نا حیثیت تخک۔ نن کرپاس نا کشارگر آتے آسراتی فراوان کرسا اونا پیدوار اٹی ودکی کینہ۔ داڑان نئے بیرہ ٹیکسٹائل نا برآمد آتیٹی ودکی مریک بلکن کرپاس نا درآمد آ خڑچ مروک آنہادی زرمبادلہ ءِ بچفنگ مریک۔ وزیراعظم دمدستی وڑاٹ دا گام گیج آتیا عملدرآمد نا پارت کرے۔
