اسلام آباد۔ 13 مارچ (اے پی پی) وزیراعظم نا خصوصی کمکار و پائیدار شونداری ہدف آتسکان رسینگ کن جوڑ پارلیمانی ٹاسک فورس انا کنوینر رومینہ خورشید عالم اومیت ظاہر کرینے کہ ملک انا ورناک جمہوریت نا شونداری و ملک انا شونداری کن فعال کڑد ادا کرسا کیرہ، ورناک تینے آئین نا بنداوی اصول و پارلیمنٹ نا بنداوی کاریم تیان باخبر تخر، اوورناتے غلط معلومداری و پروپیگنڈا نا گواچی مفننگ نا مشورہ ہم تس و پارے کہ ننا پارلیمنٹ گرین پارلیمنٹ ءِ ہراٹی چلڈرن کاکس ءِ و اسٹ انگا پارلیمنٹ ءِ ہراڑتون پائیدار شونداری نا ہدف آتیا پارلیمانی ٹاسک فورس اسے۔ داخیال آتا درشانی ءِ او دوشنبے نادے آ اسلام آباد اٹی کامن ویلتھ ڈے 2023ء نا ’’پائیدار و پرامن اسیجائی آخبت نا کنڈا ہِننگ‘‘ نا سرحال آ اڈ ہلوک سیمینار آن تران کرسا کرے۔ کنوینر پارلیمانی کاکس آن چائلڈ رائٹس مہناز اکبر عزیز پارے کہ راج اٹ امن ہر راجی باندات اٹی ورناتا فعال کڑد اتون گنڈوک ءِ۔ اوداہم پارے کہ ورناچین ءِ مسخت آتا وضاحت نا اہمیت نا احساس مرے و دامسخت آتا دوئی کننگ کن سخت خواری کننگے۔ قوم اکن کاریم کننگ نا اہمیت آ زور شاغسا اوپارے کہ پاکستان نا ورناتیٹی قوم انا تقدیر ءِ بدل کننگ نا غٹ لائخیک ساڑی ءُ۔ داوخت آ سید شمعون ہاشمی ایڈیشنل سیکرٹری ہم بشخ ہلوک آتیان تران کرے۔ اوپارے کہ ورناتے تینا لائخی تا درک ءِ خلنگ و پورو است اٹ ملک انا خذمت ءِ کننگ نا گرج ءِ۔ اوداہم پارے کہ پاکستان اٹی ورناتے پروپیگنڈا و غلط معلومداری تا جنگ آن تینے جتا کیر۔ اوداہم پارے کہ ملک انا شونداری کن تعلیم نا چاہندار و ہُشار بندغ آتا کڑد اہم ءِ۔ سیمینار اٹی مچ آ ملک آن ہُشار بندغ و طالب علم آتا بھلو کچ اس بشخ ہلکر۔
