اسلام آباد۔ 13 مارچ (اے پی پی) سینیٹ نا قائمہ کمیٹی تعلیم و تربیت نا چیئرمین سینیٹر عرفان صدیقی پارینے کہ قائد اعظم یونیورسٹی نا بھلو وخت اسے آن بند مننگ است ہسونی اسے، دا باندات ءِ کمیٹی نا بروک آ میٹنگ ناایجنڈا ٹی اوار کننگانے۔ دوشنبے نادے آ داڑے پارلیمنٹ ہاؤس نا پیشن صحافی تتون گپ وتران کرسا اوپارے کہ مچ آ ملک انا چندی جامعہ غاتیٹی طالب علم آتا نیام اٹ جھیڑہ نا خبر ملسا کیک ہرافتا توننگ المی ءِ۔ سینیٹر عرفان صدیقی پارے کہ جامعہ غاتا بھلو وخت اسسکان چانسلر آتیان بیدس چلیفنگ اسہ وڑاسے ٹی ہم سہی اف، ہندا سوب آن کیہی انتظامی ویل ودی مریک۔ عرفان صدیقی پارے کہ قائمہ کمیٹی نا بروک آ دیوان اٹی دا بھلا باندات نا غٹ پلوآتا سرجمی اٹ جاچ ءِ ہلنگک۔
