اسلام آباد۔ 13 مارچ (اے پی پی) پاکستان مسلم لیگ (ن) اسلام آباد نا سینئر راہشون بیگم شاہدہ قدیر پارینے کہ عمران خان تینا دور ءِ اقتدار اٹی سخت شڑت آتیا آئی ایم ایف تون معاہدہ کرسا ملک ءِ بے بدل نسخان تس۔ پالیسی تا چرجوئی مفننگ نا سوب آن پاکستان شون ہلنگ کتو۔ تینا بیان اٹی او پارے کہ 2013ء ٹی قائد مسلم لیگ (ن) و مسکوہی وزیراعظم محمد نواز شریف اقتدار اٹی برسا زرگزران ءِ سنبھالاو دہشت گردی، بجلی، گیس نا لوڈشیڈنگ ءِ چٹفنگ و ملک و قوم ءِ سی پیک، موٹروے ، میٹروبس، میٹرواورنج ٹرین کون آ آب اٹو ٹیکی تس، اونا حکومت نا چٹنگ آن ملکی شونداری نا پہیہ سلیس۔ اونا پاننگ ئس کہ عمران خان اُراٹی تولسا ایلوتے دھڑکو ایتک، اودے ملک انا ساڑی سنجیدہ حالیت آک نظر بفننگ ءُ، او آئی ایم ایف تون معاہدہ ءِ بے سہب کننگ نا سازش کرے تانکہ پاکستان خواتہ مرے و داڑے سری لنکا کون آ حالیت ودی مرے۔ اوپارے کہ پی ٹی آئی تینا سیاست ءِ بچفنگ کن ملک ءِ گہیو تخا وخت اس کہ مسلم لیگ (ن) تینا سیاست نا قربانی ءِ ترسا ملک ءِ ڈبینگ انگ آن بچفے۔
