اسلام آباد ۔ 13 مارچ (اے پی پی) بنجائی وزیر جان جوڑی عبدالقادر پٹیل پارینے کہ سندھ و پنجاب اٹی دوشنبے نادے آن بناکروک آ پولیو تور مہم اٹی 21 ملین آن زیات چناتے رکھی پڑی کُنفنگک۔ دوشنبے نادے آ وزارت جان جوڑی آن جاری بیان نا رداٹ بنجائی وزیر پارے کہ ہفت می قومی مردم شماری نا سرجزآتا سوب آن پنچ دے ئی پولیو مہم اِرا ریسہ غاتیٹی اڈتننگ انگ ءِ ، اولیکو ریسہ ٹی 13 آن 17 مارچ اٹی پنجاب نا 13 ضلع، سندھ انا 16 ضلع و اسلام آباد اٹی 5 سال آن کم وئی نا17.41ملین آن زیات چناتے پولیو نا رکھی پڑی کُنفنگک، ارٹ میکو ریسہ 3 آن 7 اپریل اسکان مریک۔ اوپارے کہ روچہ نا ارٹ میکو ہفتہ ٹی بلوچستان نا 12 ضلع و خیبرپختونخوا نا 26 ضلع بشمول صوبہ نا سویلی ہفت ضلع غاتیٹی 4.12ملین آن زیات چناتے پولیو آن بچفنگ نا پڑی کنفنگک۔ عبدالقادر پٹیل لمہ و باوہ غاتیا زور شاغا کہ او تینا چناتے پولیو ویکسین ایتر تانکہ او پولیو دین آن رکھ مریر۔ اوپارے کہ چاگڑد اٹی پولیو دین انا ساڑی گری آن معلوم مریک کہ دا دین ننا کمیونٹی ٹی گردش کننگ اٹی ءِ و ننا چناتیکن بھلو خطرہ اسے۔ وزیر جان جوڑی پارے کہ روچہ و عئید انا خڑک بننگ تون آبادی نا ہن و بر دین ءِ پین تالان کننگ نا خطرہءِ ودفنگ کیک،ہنداسوب آن المی ءِ کہ لمہ وباوہ تینا چناتے نئے بیرہ دا مہم اٹی بلکن ہر مہم اٹی پولیو تور نا پڑی ضرور کنفر۔
