کوئٹہ۔ 13 مارچ(اے پی پی)پاکستان پیپلزپارٹی بلوچستان زالبول ونگ انا نائب صدر و فوکل پرسن ورکرز ویلفیئر بورڈ اسکولز ماہ جبین خالد جمالی پارینے کہ پاکستان پیپلزپارٹی نا سرکڑدہ غاک ملک و قوم کن جون تا قربانی تسنو ہندا سوب ءِ کہ پیپلزپارٹی نا اسہ اسہ جیالہ قربانی نا قدر آن بلد ءِ، پیپلزپارٹی نا جیالہ غاک عمرانی فتنہ نا ملک و ادارہ غاتا برخلاف غٹ چم آتے بے سہب کیرہ۔ داڑے جاری مروک اسہ بیان اسے ٹی ماہ جبین خالد جمالی پارے کہ چیئرمین پی ٹی آئی عمران نیازی ملک اٹی ہڑدڑ تالان کننگ و لاش آتیا سیاست کننگ نا جاگہ غا نرزوری نا درشانی ءِ کرسا عدالت آتون مون ایتے مچی اتون عدالت آتیٹی پیش مرسا کارندہ غاتے ڈھال جوڑ کننگ و ورکرآتے بچفنگ نا خواست کروک آ لیڈر اسے نا آخا بلکن اسہ لغور ءُ انسان اسے نا کاریم ءِ۔ اوپارے کہ سینئر سیاست دان تا بے شرفی و بھلو بھلو دعویٰ کننگ عمران نیازی نا نرزوری آخا بلکن ٹیرتکائیک ءُ۔ اوپارے کہ عمران نیازی تینا دور ءِ اقتدار اٹی پیپلزپارٹی و ایلو سیاسی جماعت آتا سرکڑدہ غاتے دروغ انا مقدمہ جوڑ کرسا زندان تیٹی بند کرے ولے اینو او تینٹ عدالت آتیٹی پیش مفرسا اوفتا توہین ءِ کننگ اٹی ءِ۔ اوپارے کہ عمران نیازی نا غلط پالیسی تا سوب آن ملک زرگزرانی تنکی تا گواچی مس پاکستان پیپلزپارٹی ہی ہمو اسٹ انگا سیاسی جماعت ءِ ہرا ملک ءِ ساڑی آ تنکی تیان کشنگ نا لائخی تخک ۔ اوپارے کہ پاکستان پیپلزپارٹی نا کارندہ غاک لس گچین کاری تا تیاری ءِ کیر انشاء اللہ بروک آ وخت پاکستان پیپلزپارٹی نا ءِ۔
