اسلام آباد ۔ 18 مئی (اے پی پی) مزن وزیر محمد نواز شریف چین ئُُ ہانگ کانگ ئِ تر ئُُ تاب سرجم کنگ ئَ پد پنچ شمبے ئَ اسلام آباد ئَ واتر پُج اِت۔ایشی ئَ چہ پیسر ہانگ کانگ ئِ بالی پٹ ئِ سر ئَ مزن وزیر ئَ را رکست کنگ ئَ ٹوھیں کارندہ اتکگ آتنت۔ ون روڈ فورم ئَ بھر زوری ئِ ھاترا چینی صدر شی جن پنگ ئِ داتگیں دعوت ئِ پد ئَ چین ئِ تر ئُُ تاب ئِ کتگ اَت۔ مزن وزیر محمد نواز شریف ئَ بیجنگ ئَ بیلٹ اینڈ روڈ فورم ئَ ایندگہ میاں اوستمانی کارندہ آں گوں ھوار بوت ئُُ بے مٹ ایں گشتانک دات۔ مزن وزیر محمد نواز شریف ئَ فورم ئَ گول میز کانفرنس ئَ بھر زوری کت۔ مزن وزیر ئَ بیجنگ ئَ چین ئِ صدر شی جن پنگ ئُُ مزن وزیر لی کی چیانگ ئَ ھم گوں گند ئُُ نند کُت۔ اے موہ ئِ سر ئَ آئی ئَ بازیں میاں اوستمانی سروک آں گوں گند ئُُ نند کُت ایشانی تہ ئَ دو نیمگی یکوئی ئُُ پڑ ئِ جاور ھال آنی سر ئَ ھیال ریچی ھم کت۔ یات دارگ بہ بیت کہ بیلٹ اینڈ روڈ فورم ئِ بنگیج چین ئِ صدرشی جن پنگ ئَ 2013ئَ کتگ اَت۔ اے فورم شاہراہ ئِ ریشم اقتصادی راہداری ئُُ 21بیست ئُُ یکمی صدی ئِ زرّی راہداری پروگرام ئِ بھر اِنت۔ بیلٹ اینڈ روڈ فورم ئِ مکسد یکجائی ھد ئُُ ابیل آنی گرگ ئُُ کمک ئَ را گیش کنگ اِنت۔ مزن وزیر محمد نواز شریف ئَ چین ئِ شہر ہینگ ژوئِ ھم تر ئُُ تاب کت آھودا آئی ئَ نامداری پورٹل ”علی بابا“ ہیڈ کوارٹرز ئِ تر ئُُ تاب کُت ئُُ منوگری ئِ سرئَ دست چنگل ئِ مراگش ئَ ھم ھوار بوت۔ ایشی ئَ ابید وتی تر ئُُ تاب ئِ دومی بھر ئِ تہ ئَ مزن وزیر ئَ ہانگ کانگ ئَ کاروباری مردم آں گوں گند ئُُ نند ئَ ابید سرمایہ کاری کانفرنس ئَ گشتانک ھم دات۔
