پاک فوج دہشت گرد آتا برخلاف بے پرخ آپریشن کننگ ئِ، دہشت گردی نا برخلاف گچین آپریشن تا سوب داسہ پاکستان اٹی دہشت گرد آتے ہچ ئُ رُکھوک ئُ پناہ گاہ اس اف
راولپنڈی۔ 18مئی (اے پی پی) پاک فوج انا سروک جنرل قمر جاوید باجوہ پارینے کہ پاک فوج دہشت گردآتا برخلاف بے پرخ آپریشن کننگ ئِ، دہشت گردی نا برخلاف گچین آپریشن تا سوب داسہ پاکستان اٹی دہشت گرد آتا ہچ ئُ رکھ ئُ پناہ گاہ اس اف۔ نن پوسکن آ تاریخ اٹی نئے بیرہ دہشت گردی نا بدانگا یلغار نا مقابلہ ئِ کرین بلکن نن لہر آتا مون ئِ اسہ پلو کرینن، پروپیگنڈہ نا سوب بحیثیت قوم پاکستان دہشت گردی ئِ مسترد کرینے دا ننا راجی و مذہبی اقدار نا سوگوی نا صفائُ شاہدی اسے، دنیا نا ہچ ئُ طاقت اس پاکستان ئِ جہانی کہول آ تنیا کننگ کپک، نناہمسایہ غاتیٹی بھارت انتہاپسندی نا مون آ سلہہ بٹینے ، بھارت اٹی خاربنجائی دنگ انا دروشم اس اختیار کرینے ، کنے دنیا نا غٹ آن گچین ، بہادر و پرعزم فوج انا سپہ سالار مننگ آ فخر ئِ، تدوک آ دے تیٹی فوج و داکان مست خاص کر کنے ہم ٹارگٹ کننگا ، اولیکو فیصلہ ئِ کریٹ تو مارپارے کہ نی اسہ پنی ولے غلط فیصلہ اس کریس، ارٹ میکو فیصلہ ئِ کریٹ تو مار پارے کہ داسہ نی غیر مقبول ولے درست ئُ فیصلہ اس کریس۔ او پنچ شنبے نا دے جی ایچ کیو ٹی آئی ایس پی آر و ایچ ای سی نا اواری اٹ انتہاپسندی ئِ مسترد کننگ اٹی ورنانسل انا کڑد انا سرحال آن اڈہلوک آ سیمینار آن تران کریکہ۔ چیئرمین ہائیر ایجوکیشن کمیشن پروفیسر مختار احمد ، ڈی جی ملٹری آپریشن، ڈی جی آئی ایس پی آر میجر جنرل آصف غفور ، لیفٹیننٹ جنرل عاصلم سلیم باجوہ تون اوار بڑزکو فوجی کمامدار، مچ آ ملک انا 100آن زیات یونیورسٹی تا وائس چانسلر ، سینئر صحافی و طالب علم آتا بھلو کچ اس دا وخت آ ساڑی ئسر۔ سیمینار نا اولیکو سیشن اٹی ڈاکٹر شعیب سڈل انتہاءپسندی نا خلیس و فالٹ لین، اسلامیہ یونیورسٹی پشاور نا حریم ظفر مذہبی پلو و کالم نوشتوک غازی صلاح الدین میڈیا ناکڑد، ارٹ میکو سیشن اٹی ڈاکٹر فرخ سلیم پروفیسراحمد رفیق اختر انتہاءپسندی نا جتا پلو آتے مون آ تخار۔ آرمی چیف جنرل قمر جاوید باجوہ دود آن تران کرسا پارے کہ نن اسہ قوم اسے نا وڑاٹ دہشت گردی نا لعنت نا برخلاف بہادری اٹ مقابلہ کرین، ننا سلہہ بند فوج دہشت گردی نا برخلاف جنگ اٹی بے مثل قربانی ترسا دنیا کن اسہ مثال اس قائم کرینے ، ننا دا سرسہبی تا اعتراف ئِ مچ آ دنیا کننگ ئِ۔ اوپارے کہ کنے دنیا نا غٹ آن گچین ، بہادری و پرعزم فوج انا سپہ سالار مننگ آ فخر ئِ ، کنے دا پاننگ اٹی ہچ ئُ ہچکچاہٹ اس اف کہ ننا فوج دنیا نا گچین انگا فوج ئِ۔ اوپارے کہ داغٹ نما غٹ انا مخ تفی آن بیدس مننگ کتوسہ، نمے آن ہر اسٹ ننا پشت آٹی ئِ۔ اوراج انا غٹ تپہ خاص کر کانود نافذ کروک آ ادارہ، میڈیا نا کنڈآن مخ تفی فراوان کننگ نا ستائِ کرے۔ اوپارے کہ اینو نن دہشت گردی نا برخلاف جنگ نا اہم انگامرحلہ غاتیٹی اُن۔ دہشت گردی نا برخلاف بھلا آپریشن تیان پدریسہ گدرینگسا داسہ آپریشن ردالفساد نا رداٹ ایلو سلوک آ خلیس نا برخلاف پیچیدہ و ٹارگٹڈ آپریشن کننگ اُن۔ ننے دا ہیت ئِ ہم المی جوڑ کروئی ئِ کہ دہششت گردی نا اسباب آتا ازالہ و قومی ایکشن پلان آ اونا روح انا رداٹ عمل مرے، دا اسباب آتیٹی اولین انتہاءپسندی ئِ ولے دا ہیت یات تخنگ نا ئِ کہ ہراتم فوج دہشت گردی آتون جنگ کیک تو کانود نافذ کروک آ ادارہ و راج دہشت گردی و انتہاءپسندی تون جنگ کیک۔ اوپارے کہ پاکستان نا 50 درسد آن زیات آبادی 25سال آن کم وئی نا ئِ، ننا ملک انا آخبت ہمو سمت آ منحصر ئِ ہرا ننا ورنا بروک آ منہ سال اٹی اختیار کیرہ۔ آرمی چیف پارے کہ نن رہی آ سلوک اُن ، یا تو نن ورناتا بھرم آتیان فائدہ ہرفنہ یا تو انتہاءپسندی نا زد اٹی بروک آ ورناتا دوتے اٹ مشکل آتیان دوچارمرینہ۔ اوپارے کہ نن دہشت گردی ئِ اواری اٹ شکست تسونن و داسہ تینا اقدار، ذہنی و جسمانی لائخی تا کمک اٹ اواری اٹ انتہاءپسندی ئِ ماس آن کشنہ، نن ملک انا کنڈ کنڈ اٹی ریاست نا عملدراری ئِ المی جوڑ کرینن اینو پاکستان اٹی اسہ شرپسند اسے کن ہم ہچ ئُ رکھوک پناہ گاہ اس اف ، نن داہیت ئِ المی جوڑ کننگ اُن کہ سلوک آ عنصرآک ہم ملک انا برخلاف پاکستان نا گل زمین ئِ استعمال کننگ کپس و نئے نن دا دے سگنہ کہ ننا برخلاف پین اسٹ اس دُن کہ۔ اوپارے کہ ہچ گہس آ تینا خیال آتا مسلط کننگ مفک، مذہب اٹی ہم ہچ ئُ جبر اس اف۔ ننا راج آن بیدادی ئِ کم کروئی مرے تانکہ نن پاکستان نا تشکیل نوئِ کننگ کین، دنیا مون آ ہِننگ ئِ و نن پدی سلنگ نا متحمل مننگ کپنہ ۔ اسہ سوج اسے نا ورندی ٹی اوپارے کہ کراچی، بلوچستان یا ہراکہ بشخ اٹی امن نا ہیت مرے تو پاک فوج کائک۔ ریکوڈک و سند ھ طاس معاہدہ آ فوج کاریم کننگ ئِ ہنداوڑ کلبھوشن یادیو نا برخلا ف کیس آ وکیل ہم پاک فوج فراوان کرینے۔
