پاک اوغان سیم انا خڑک گڑاس خلق آتا اسیجائی سروے پورو، دانانتیجہ غاتا روشنی ٹی سیم ئِ ملنگ نا فیصلہ کننگک
بھارت نا جوہری پروگرام سویلی ایشیاءٹی سٹریٹجک سوگوی و پاکستان نا قومی سلامتی کن خطرہ اسے
اسلام آباد۔ 18مئی (اے پی پی) ترجمان دفترخارجہ پارینے کہ پاک اوغان سیم انا خڑک گڑاس خلق آتا اسیجائی سروے ئِ پورو کننگانے و دانا نتیجہ غاتا روشنی ٹی سیم ئِ ملنگ نا فیصلہ کننگک، بھارت نا ترندی اٹ مون آ ہنوک آ جوہری پروگرام سویلی ایشیاءٹی سٹریٹجک سوگوی و پاکستان نا قومی سلامتی کن خلیس اسے، درمان نا غرض آن بھارت ہنوک آہر میڈیکل ویزاکن سلاہکار خارجہ نا سفارشی چھٹی نا بابت بھارتی گام مضحکہ خیز ئِ، بھارت مقبوضہ کشمیر اٹی آبادی نا تناسب ئِ بدل کننگ نا کوشست کننگ ئِ، ریٹائرڈ بھارتی فوجی کارندہ و ہندوتے مقبوضہ کشمیر اٹی ڈغار تا الاٹمنٹ سلامتی کونسل نا قراردادآتا سنگین خلاف ورزی ئِ۔ اوغان ویل انا فوجی ایسری ممکن اف۔ بیرہ ہیت وگپ نا کمک اٹ ہی پائیدار امن ئِ اڈتننگ مریک۔ جہانی عدالت انصاف ئِ بھارتی راایجنٹ نا کیس انا سماعت نا ہچ ئُ اختیار اس اف، امریکہ نا کنڈآن ودکی فوج گدریفنگ نا مسخت اوغان سیکورٹی فورس آتا لائخی و فوجی تربیت اٹی ودکی کننگ نا ئِ۔ داہیت ئِ دفترخارجہ نا ترجمان محمد نفیس ذکریا پنچ شنبے نا دے ہفتہ وار پریس بریفنگ اٹی صحافی تا جتا سوج آتا ورندی ئِ ترسا پارے۔ بھارت تون 2600 ایٹمی سلہہ غاتا تیاری کن ایٹمی مواد نا ساڑی گری نا بابت ساڑی آ رپورٹ نا بابت اسہ سوج اسے نا ورندی ئِ ترسا ترجمان پارے کہ دنیا ٹی بھارت نا ترندی اٹ مون آ ہنوک آ جوہری پروگرام سویلی ایشیاٹی سٹریٹجک سوگوی و پاکستان نا قومی سلامتی کن خلیس اسے۔ ترجمان پارے کہ بھارت ئِ سول جوہری معاہدہ نا رداٹ جوہری ایندھن ، ازباب، و ٹیکنالوجی نا درآمد و 2008 ءٹی نیو کلیئر سپلائرز گروپ نا کنڈآن چھوٹ آن پاکستان نا سلامتی ئِ خلیس آتا مون تروکی ئِ۔ ترجمان این ایس جی باسک آتیا زور شاغا کہ او داخلیس آتا رداٹ بھارت ئِ جوہری مواد نا منتقلی و نئی دہلی نا این ایس جی نا رکنیت نا معاملہ غا سجفیر۔ ترجمان پارے کہ گدرینگوک آ منہ سال اٹی کیہی جہانی تھنک ٹینکس آتا چاہندارآک بھارت نا بے رکھ ایٹمی ری ایکٹرز و ایٹمی معاد آ گڑتی تا درشانی ئِ کرینو۔ اسہ سوج اسے نا ورندی ئِ ترسا ترجمان درمان نا غرض آن بھارت آ ہنوک آ ہر میڈیکل ویزا کن سلاہکار خارجہ سرتاج عزیز نا کنڈآن بھارتی وزارت خارجہ امور ئِ سفارشی چھٹی نا بابت بھارتی گام ئِ مضحکہ خیز گوندا و پارے کہ بین الریاستی تعلقداری تیٹی دانا مثال ملیپک۔ مقبوضہ کشمیر اٹی حالیت آتا بابت اسہ سوج اسے نا ورندی ئِ ترسا ترجمان پارے کہ ہندو دہشت گرد تنظیم آر ایس ایس مقبوضہ کشمیر اٹی تینا سرجزآتے ترند کرسا یونٹس قائم کننگ ئِ ۔ آر ایس ایس 1947ءٹی ڈوگرا و بھارتی کوزہ گر فورس آتون اوار پنچ لکھ آن زیات کشمیری مسلمان تا لس خون ئِ کریسس۔ اینو ہم دہشت گرد تنظیم نا بیدادی نا چرجوئی برجائِ۔ ورناکشمیریک خاص کر طالب علم آک آر آر ایس نا نشانہ غاٹی ئُ۔ ترجمان پارے کہ بھارت مقبوضہ کشمیر اٹی آبادی نا تناسب ئِ بدل کننگ نا کوشست کننگ ئِ۔ بھارتی ریٹائرڈ فوجی کارندہ و ہندو تے مقبوضہ کشمیر اٹی ڈغار الاٹ کننگ انگ ئِ، ہرا اقوام متحدہ نا سلامتی کونسل نا قرارداد آتا سنگین خلاف ورزی ئِ۔ ترجمان آئی سی جے نا بابت اسہ سوج اسے ناورندی ئِ ترسا پارے کہ جہانی عدالت انصاف ئِ بھارتی را ایجنٹ نا کیس انا سماعت نا ہچ ئُ اختیار اس اف۔ داپاکستان نا سلامتی نا معاملہ ئِ۔ اوغانستان نا بابت اسہ سوج اسے نا ورندی ئِ ترسا ترجمان پارے کہ اوغان ویل انا فوجی ایسری ممکن اف۔ اوغانستان اٹی بیرہ ہیت وگپ نا کمک اٹ ہی پائیدار امن قائم کننگ مریک۔ اسہ سوج اسے نا ورندی ئِ ترسا ترجمان پارے کہ امریکہ نا کنڈآن ودکی فوج گدریفنگ نا مسخت اوغان سیکورٹی فورس آتا لائخی و فوجی تربیت اٹی ودکی کننگ نائِ۔
