حکومت الس ئِ معیاری و ہڑزان طبی آسراتی فراوان کننگ کن پرعزم ئِ
راولپنڈی۔ 18مئی (اے پی پی) صدر مملکت ممنون حسین پارینے کہ ساڑی حکومت الس ئِ معیاری و ہڑزان طبی آسراتی فراوان کننگ کن پرعزم ئِ و داچرجوئی ٹی قومی جان جوڑی پروگرام نا بناءکننگانے۔ طبی چاہندار و ڈاکٹر آتے بایدے مرے کہ خلقت نا مشکل آتے کم کننگ اٹی تیناکڑد ئِ ادا کیر۔ داہیت ئِ او پنچ شنبے نادے آرمی میڈیکل کالج نا کانووکیشن 2017ءنا دود آن تران کرسا پارے۔ داوخت آ ایجوٹینٹ جنرل لیفٹیننٹ جنرل انور علی حیدر، نیشنل یونیورسٹی آف میڈیکل سائنسز نا وائس چانسلر سید محمد عمران مجید و سرجن جنرل لیفٹیننٹ جنرل آصف ممتاز سکھیرا و آرمی میڈیکل کالج نا پرنسپل میجر جنرل سلیم احمد خان ئسک ہم ساڑی ئسر۔ صدر مملکت پارے کہ ترقی پذیر ملک انا حیثیت اٹ ننا وسیلہ غاک کچ اٹ ئُ و نیزگاری، پسماندگی و گڑاس ایلو راجی و معاشی سوب آتا پیش نظر درمان نا حالیت آک بھاز پیچیدہ ئُ، بے شمار خلقت داڑکن مرک انا باٹی کارہ یا تینا زندئِ معذوری نا عالم اٹ گدریفرہ انتئے کہ نیزگاری و مریس فاصلہ غاتا سوب درمان آن محروم مریرہ۔ داوڑنا حالیت آتیٹی طبیب آتا خداترسی و رفاحی ادارہ غاتا کڑد اہم مریک۔ صدر مملکت پارے کہ پاکستانی راج دامعاملہ ٹی بھاز خوش قسمت ئُ ولے طبی تعلیم نا ادارہ و ننا ورناڈاکٹر تینا ایلو پیشہ ورانہ زمواری تا ادائیگی تون درمان ئِ آسان و ہڑزان جوڑ کننگ کن جاست وپاستی کوشست کیر تو دانا بھاز جوانئُ نتیجہ دوئی مریک۔ صدر مملکت پارے کہ نیشنل یونیورسٹی آف میڈیکل سائنسز و داڑنا ایلو قومی ادارہ غاک جاست وپاست آ چکار تخسا خیر انا کاریم نا اسہ پوسکن ئُ چرجوئی اسے نا بنائِ کننگ کیرہ تانکہ ڈکھیا انسانیت نا خذمت نا جدید و آسان وڑوڈول پٹنگ مرے۔ داوخت آ نیشنل یونیورسٹی آف میڈیکل سائنسز نا وائس چانسلر لیفٹیننٹ جنرل عمران مجید و آرمی میڈیکل کالج نا پرنسپل میجر جنرل سلیم احمد خان ئسک ہم تران کریر۔ دود اٹی ایم بی بی ایس و بی ڈی ایس نا امتحان تیٹی نمان پوزیشن دوئی کروک آ طالب علم آتے صفتی سند و میڈلز تننگا۔
