اسلام آباد۔ 14 فروری (اے پی پی) بنجائی وزیر کانود و انصاف سینیٹر اعظم نذیرتارڑ چیف جسٹس آف پاکستان عمرعطابندیال نا ریمارکس ءِ سوشل میڈیا غا غلط وڑاٹ پیش کننگ نا باندات آ اٹارنی جنرل آف پاکستان نا چٹھی ءِ ایوان اٹ پیش کرے۔ سے شنبے نادے آ سینیٹ نا دیوان اٹی بنجائی وزیر کانود و انصاف سینیٹر اعظم نذیر تارڑ پارے کہ اٹارنی جنرل آف پاکستان چیئرمین سینیٹ، سینیٹ نا باسک و وزیر کانود ءِ چٹھی اس نوشتہ کرینے۔ دا چٹھی ءِ او امانتا کنے آ گدریفینے ہرادے ایوان اٹی پیش کننگ اٹی اُٹ، اٹارنی جنرل تینا چٹھی ٹی نوشتہ کرینے کہ او دا وخت آ عدالت اٹی ساڑی ئسک ہراتم دا پاننگاکہ بیرہ اسہ وزیراعظم اس دیانتدار ئسک، دُن ءُ ہچ ءُ ہیت اس متنے، داریمارکس آک راستکی تیان چپ ئسر، عدالت اٹی 1988 ء و 1993 ء نا فیصلہ غاتا بابت ہیت مسوسس۔ چیف جسٹس تینا ریمارکس اٹی حوالہ تسوسس کہ ہراتم 1988ء ٹی اسمبلی تحلیل مسوسس، و اونا کیس سپریم کورٹ اٹی بسوسس، ہمووخت آ اسمبلی ءِ بحال کننگتو و گچین کاری تا پرمان تننگا دا غلط ئسک، چیف جسٹس داہیت ءِ ریکارڈ نا درستگی کن پاریسس۔ دا بابت سوشل میڈیا غا رپورٹ آک درست افس۔ وزیر کانود پارے کہ نیب کیس اٹی سپریم کورٹ پارینے کہ نی دانستہ وڑاٹ اسمبلی تے ہلاس، کانود سازی کن اسمبلی ٹی مرسا بایدے ہیت کننگوسس۔ اوپارے کہ پی ٹی آئی والاک تینا زنچک اٹی ہلیر ہُریر، تینا قبلہ ءِدرست کیر، ہراتم اوفتا استیفہ غاک منظور مسر تو اوغنگ ءِ شروع کریر۔ چیئرمین سینیٹ محمد صادق سنجرانی ہم پارے کہ اودے ہم اٹارنی جنرل آف پاکستان نا کنڈان چٹھی اس دوئی مسنے۔ سینیٹر رضاربانی پارے کہ اٹارنی جنرل ءِ دا ایوان اٹ تولنگ ناحق دوئی ءِ، او دا ایوان نا باسک اف ہنداخاطران پارلیمانی کارروائی نا بشخ اف،اٹارنی جنرل عدالت اٹی ہم پارلیمنٹ نا موقف ءِ بایدے بیان کے۔
