بھارت نا کنڈآن پاکستان نا معاملہ غاتیٹی دخل اندازی قابل مذمت ئِ، نن دشمن آ صفا کننگ خوانہ کہ نن تینا جغرافیائی و نظریاتی دنگ انا رکھ ئِ کننگ چانہ
کوئٹہ۔ 18 مئی (اے پی پی) سینیٹ نا ڈپٹی چیئرمین مولانا عبدالغفور حیدری پارینے کہ بھارت نا کنڈآن پاکستان نا معاملہ غاتیٹی دخل اندازی قابل مذمت ئِ، نن دشمن آ صفا کننگ خوانہ کہ نن تینا جغرافیائی و نظریاتی دنگ انا رکھ ئِ کننگ چانہ، داخیال آتا درشانی ئِ او پنچ شنبے نا دے اسلام آباد رادہ مننگ آن مست پریس کانفرنس آن تران کرسا کرے۔ داوخت آ جمعیت علماءاسلام بلوچستان نا صوبائی امیرمولانا فیض اللہ ، صوبائی جنرل سیکرٹری ملک سکندرخان ایڈووکیٹ ، عزیزاللہ پکتوی و ایلوک ہم ساڑی ئسر۔ سینیٹ نا ڈپٹی چیئرمین پارے کہ بھارتی جاسوس نا پاکستان آن دزگیری و بھارت نا کنڈآن ریشہ دوانیاں قابل تشویش ئِ ولے پاکستان اسہ ناقابل تسخیر ایٹمی واک اسے نن گل زمین نا رکھ اکن بھلو قربانی تننگ چانہ اسہ سوج اسے نا ورندی ٹی سینیٹ نا ڈپٹی چیئرمین پارے کہ جمعیت علماءاسلام دہشت گردی نا کسر اٹی بھلو اڑاند اسے جاست وپاستی ادارہ غاک سانحہ مستونگ نا جاست وپاست ئِ کننگ ئُ ملک انا سلامتی شونداری امن و شونہالی کن جمعیت علماءاسلام نا تحریک دشمن نا بزدلانہ کارروائی تیان سلپک نن تینا مشن ئِ پبی وڑاٹ برجاتخنہ۔ اسہ پین سوج اسے نا ورندی ٹی پارے کہ کنے آ جلہو اولیکو ہلو2014ءٹی ننا قائد مولانا فضل الرحمان آ خودکش جلہو کننگا نن 7، 8، و 9 اپریل آ پشاور اٹی سرسہب جہانی اجتماع اس کرسا 50لکھ بندغ ئِ ہراجوان وڑاٹ سنبھالان برسا ننے ملکی اقتدار ملا تو نن پاکستان اٹی امن و ایمنی ئِ برقرار تخنگ اٹی سرسہب مرینہ۔ اوپارے کہ پاکستان اسلام ن اپن آ جوڑ مس ای مچ آ قوم و ملکی و جہانی شخصیت آتا منت وار اُٹ ہرافک تینٹ برسا بذریعہ ٹیلی فون کنا طبیعت نا بارواٹی ہریفیر ، کنے شہید سنگت آتا ڈکھ ئِ شہید نا ہرا موت ئِ او قوم انا حیات ئِ۔
