راولپنڈی۔ 18مئی (اے پی پی) دہشت گردی نا بابت سنگین ڈوہ تیٹی اوار پین 4ڈوہدار دہشت گرد آتے پنچ شنبے نا دے خیبر پختونخوا نا جیل اٹی پاہو تننگا۔ پاہو کنوک آ دہشت گرد آک بے گناہ شاری تا جان ئِ ہلنگ، مواصلاتی و بجلی نا انفراسٹرکچر ئِ بھس کننگ، تعلیمی ادارہ غاتا تباہی، سلہہ بند فوج و کانود نافذ کروک آ ادارہ غاتیا جلہو کون آ سنگین ڈوہ تا مرتکب خننگاسر ۔ پاک فوج انا شعبہ تعلقات عامہ (آئی ایس پی آر) نا رداٹ ہر چار آ ڈوہدار تیا فوجی عدالت آتیٹی مقدمہ چلیفنگا و اوفتے موت انا سزا بنفنگا۔ سرجم احوال آتا رداٹ محمد ابراہیم ولد ماسین تحریک طالبان پاکستان نا سرگرم ئُ باسک اس ئس، او شاری تے تپاخت کننگ، پول ئِ بھس کننگ و پاکستان نا سلہہ بند فوج آتیا جلہو کننگ اٹی اوار خننگا ہراٹی شاریک و اسہ فوجی اس تپاخت کرے۔ اونا کوزہ آن دھماکہ خیز مواد ہم دوئی مسوسس۔ او مجسٹریٹ و ٹرائل کورٹ انا مون آ تینا ڈوہ ئِ امنا کرے و اوکان پد اودے موت انا سزا بنفنگا۔ رضوان اللہ ولد تاج میر خان ہم تحریک طالبان پاکستان نا سرگرم ئُ باسک اس ئس، او شاری تے خلنگ ، واپڈ ملازم آتے برمتہ کننگ و پاکستان نا سلہہ بند فوج آ جلہو اٹی اوار خننگا ہراٹی اسہ افسر و اسہ ورناس ٹھپی مس۔ اونا کوزہ آن آتشی سلہہ و دھماکہ خیز مواد ہم دوئی مسوسس۔ او مجسٹریٹ و ٹرائل کورٹ انا مون آ تینا ڈوہ ئِ امنا کرے۔ اودے موت انا سزا بنفنگا۔ سردار علی ولد محمد اکرم خان ہم تحریک طالبان نا اسہ سرگرم ئُ باسک اس ئس۔ او پاکستان نا سلہہ بند فوج و تعلیمی ادارہ غاتے بھس کننگ نا مرتکب خننگا ہراٹی فوجی ورناٹھپی و شہید مسر۔ اونا کوزہ آن دھماکہ خیز مواد ہم دوئی مسوسس۔ او مجسٹریٹ و ٹرائل کورٹ انا مون آ تینا ڈوہ ئِ امنا کرے۔ اودے موت انا سزا بنفنگا۔ شیر محمد خان ولد احمد خان ہم تحریک طالبان پاکستان نا اسہ سرگرم ئُ باسک اس ئس۔ او شاری تے شہید کننگ و پاکستان نا سلہہ بند فوج آ جلہو نا مرتکب خننگاہراٹی فوجی ورناک تپاخت و ٹھپی مسر۔ اونا کوزہ آن ہم آتشی سلہہ و دھماکہ خیز مواد دوئی مسوسس۔ او مجسٹریٹ و ٹرائل کورٹ انا مون آ تینا ڈوہ ئِ امنا کرے ۔ اودے موت انا سزا بنفنگا۔
