اسلام آباد۔ 17مئی (اے پی پی) بنجائی وزیر انسانی حق سینیٹر کامران مائیکل پارینے کہ آئین پاکستان ملک اٹی رہینگوک آ غٹ شاری تے بے پرخ حق انا ضمانت ایتک دا چرجوئی ٹی وزارت انسانی حق، زالبول، چناو اقلیت آتا حق انا بروخت فراوانی کن سلاہ ئی کانودی سازی اس کننگ ئِ و دارداٹ غٹ صوبہ غاتے اوار ہلسا درکار ہدف آتا بروخت پورو کننگ کن کاریم مننگ ئِ۔ چارشنبے نا دے اسہ بیان اسے ٹی بنجائی وزیر پارے کہ ساڑی حکومت وزیراعظم محمد نواز شریف نا ویژن نا رداٹ اولیتی بنداو تیا مذہبی ہم آہنگی نا مون آ دننگ تون اوار ایلو بنداوی انسانی ھق و خاص کر زالبول، چناو اقلیت آتا رکھ اکن جامع کانود سازی اس کرینے و داڑآعملدرآمد کننگ انگ ئِ ہراڑآن جہانی کہول آ پاکستان نا امیج گچین مسنے۔ اوپارے کہ پاکستان اٹی بنداوی انسانی حق انا رکھ و خاص کر زالبول و چناو اقلیت آتا رکھ اکن چندی گام گیج چست کننگانے وخت اس کہ دابابت پین کانودسازی ہم کننگ انگ ئِ ۔ اوپارے کہ پاکستان نا آئین ملک اٹی رہینگوک آ غٹ شاری تا حق انا رکھ ئِ کیک۔ ننا حکومت ملک اٹی زالبول، چناو اقلیت آتون اوار غٹ شاری تا حق انا رکھ اکن گام گیج کننگ ئِ۔ اوپارے کہ ہندوبرادری نا گڑتی تے مر کننگ کن حکومت پاکستان ہندو میرج ایکٹ نا قانود ئِ پاس کرے۔ اوپارے کہ پاکستان اٹی بنداوی انسانی حق انا رکھ خاص وڑاٹ زالبول ، چناواقلیتی برادری نا حق انا رکھ و جہانی کنوینشنز نا قرارداد آتیا عملدرآمد کن حکومت نا کنڈآن چست کروک آ گام گیج آتا جہانی کہول آ ستائِ کننگ انگ ئِ۔
