اسلام آباد۔ 16مئی (اے پی پی) پاکستان و چین نا نیام اٹ گوادر شار انا شونداری و خصوصی اقتصادی زون تے عملی دروشم اس تننگ کن چندی مفاہمتی یات داشت آتیا دستخط مسنے ، دا معاہدہ غاتا سوب ہراڑے گوادر شارئِ جہانی و جدید بندرگاہ اس جوڑ کننگ اٹی کمک رسینگک ہموڑے اقتصادی زون ئِ عملی دروشم اس ترسا پاکستان اٹی صنعتی انقلاب کن کسراس ہموار مریک۔ بیجنگ اٹی بنجائی وزیر ڈٹ بندی، شونداری و اصلاحات احسن اقبال و وزیراعلیٰ بلوچستان ثناءاللہ زہری نا ساڑی گری ٹی گوادر ڈویلپمنٹ اتھارٹی و چین نا وزارت کامرس نا نیام اٹ گوادر ماسٹر سٹی پلان نا معاہدہ و منٹس و گوادر ایسٹ بے ایکسپریس وے نا منٹ آتیا دستخط کننگا، داوخت آ بنجائی وزیر احسن اقبال نا پاننگ ئس کہ گوادر شار ئِ سنگاپور و ہانگ کانگ نا معیار نارداٹ جوڑ جاڑ کننگ انگ ئِ ، داڑے مہالوآن ہی زرکار آتا کنڈآن بے کچ است خواہی نا درشانی کننگانے ولے زوت دا شار ئِ جہانی بندرگاہ اسے نا حیثیت دوئی مریک۔ اومستی پارے کہ گوادر ایسٹ بے ایکسپریس وے ڈٹ ئِ گڈیکو دروشم تننگانے ہرانا رداٹ 18.9 کلومیٹر چار لین شاہراہ نا جوڑ جاڑ کننگک ، دا شاہراہ گوادر بندرگاہ ئِ مکران کوسٹل ہائی وے ، فری زون و آخبت نا کنٹینرز ٹرمینل تون ملفک۔ داکان بیدس پاکستان و چین خصوصی اقتصادی زون ئِ عملی دروشم اس تننگ و پالیسی سازی نا بابت مفاہمتی یات داشت آتیا ہم دستخط کریر۔ بنجائی وزیر احسن اقبال نا ساڑی گری ٹی پاکستان نا کنڈآن سی پیک نا پروجیکٹ ڈائریکٹر حسان داودبٹ و چینی کنڈآن پیکنگ یونیورسٹی نا نیوسٹرکچرل اکنامکس سنٹر نا ڈائریکٹر پروفیسر جسٹن یی فولین دستخط کرے۔ بنجائی وزیر احسن اقبال نا پاننگ ئس کہ ہڑتوم آ ملک آک اکنامک زون نا بابت آن پالیسی سازی و اسیجائی ریسرچ آ رضا مندی نا درشانی ئِ کرینے، اسہ ایلو نا علم و آزموندہ غاتیان فائدہ ہرفسا تین پہ تینی فائدہ کمکاری نا کمک اٹ سی پیک ئِ سوگو وڑاٹ مون آ دیرہ تانکہ ہڑتوم آ ملک آتا شونداری و شونہالی کن کاریم کننگے۔
