بیجنگ۔ 16مئی (اے پی پی) چین نا الیکٹرانک میڈیا و پرنٹ میڈیا وزیراعظم محمد نواز شریف نا دورہ چین خاص کر ون بیلٹ ون روڈ فورم جہانی کمکاری ٹی شرکت ئِ نمان و پبی کوریج تسنے ہرا 14آن 15مئی آ چین نا دارالحکومت اٹی اڈ ہلک و داٹی چندی جہانی راہشونک شرکت کریر۔ انگریزی و چینی زبان نا ٹی وی چینل خاص وڑاٹ چائنہ گلوبل ٹیلی ویژن نیٹ ورک ، سی سی ٹی وی و بی آئی وزیراعظم نواز شریف نا باضابطہ مصروفیات آتیٹی بھاز است خواہی ہلک و تینا خبر و ایلو پروگرام تیٹی دا بابت چندی فوٹیج ہم نشان تننگا۔ چائنہ ریڈیو انٹرنیشنل آن بیدس پیپلز ڈیلی ، گلوبل ، ٹائمز، چائنہ ڈیلی، بیجنگ ریویو و شنگھائی ڈیلی تون اوار پنی اخبار آک وزیراعظم ئِ فورم اٹی پبی شرکت نا بابت آن خبر و تجزیہ پیش کریر۔ داکان بیدس وزیراعظم محمد نواز شریف ”چائنہ یوتھ ڈیلی“ ئِ اسہ انٹرویو اسے ٹی پارے کہ پاکستان سی پیک ڈٹ انا جوڑ جاڑ اٹی چین نا اسہ قابل فخر شریدار ئِ۔ اوپارے کہ ہڑتوم آ ملک آتا نیام اٹ اِرا سال نا پبی کمکاری آن پد دا ڈٹ”اسہ پٹی اسہ شاہراہ“ اتون واقع ملک آتا حالیت آتے گچین جوڑ کننگ کن جہانی کمکاری نا اسہ اہم ئُ ماڈل اسے ٹی بدل مننگ ئِ۔ داڑے دا ہیت قابل ذکرئِ کہ چینی دارالحکومت اٹی بننگ آن پد وزیراعظم بڑزکو چینی سروک آتون اہم اوڑدہی کرے۔ چینی صدر شی جن پنگ اتون مروک آ اہم اوڑدہی آن پد ذرائع ابلاغ تون ہیت و گپ کرسا وزیراعظم نواز شریف پارے کہ چین کشمیر نا ویل آ پاکستان نا موقف نا مخ تف ئِ و او پرامن ہیت و گپ نا کمک اٹ دانا ایسری نا خواہندار ئِ۔ وزیراعظم محمد نواز شریف تینا چینی ہم منصب تون اوار ریلوے نا اپ گریڈیشن تون اوار چندی بشخ آتیٹی پاک چین کمکاری نا 6قول و اقرار تیا دستخط نا دود اٹی ہم شرکت کرے۔ وزیراعظم نواز شریف ون بیلٹ ون روڈ فورم نا پورو دیوان آن تران کرسا پارے کہ سی پیک ڈیہہ ٹی غٹ ملک آتے کن ملوک ئِ۔ فورم نا آخریکو دے وزیراعظم نواز شریف لیڈرز راﺅنڈ ٹیبل نشست آتیٹی شرکت کرے و ہراٹی تین پہ تینی شونداری کن خڑکی شریداری آ چکار تخنگا۔ وزیراعظم چینی صدر و ایلو جہانی راہشون آتون اوار فورم نا ارٹ میکو دے ورکنگ لنچ اٹی ہم شرکت کرے۔ وزیراعظم نواز شریف تینا دورہ ٹی ترک صدر رجب طیب اردوان ، ویت نام نا صدر تران دائی، ایتھوپیا نا وزیراعظم ہیلی ماریم دیسا لین ، بیلاروس نا صدر الیگزینڈر لوکاشینکو تون اوار جہانی راہشون آتون اوڑدہی کرے ہرافتے ٹی تین پہ تینی است خواہی و علاقائی معاملہ غاتیا ہیت وگپ مس۔ وزیراعظم تینا دورہ نا ارٹ میکو مرحلہ غا چین نا شار ہینگ ژو نا دورہ ئِ کرے ہراٹی او چین نا پنی ای پورٹل علی بابا گروپ نا ہیڈ کوارٹر ز نا دورہ ئِ کرے۔ داوخت آ پاکستان و علی بابا گروپ نا نیام اٹ پاکستان اٹی ای کامرس نا مون آ دننگ کن مفاہمت نا یات داشت آتیا دستخط ہم کننگا۔ وزیراعظم سے شنبے نادے مسہ دے ئی سرکاری دورہ غا ہانگ کانگ رادہ مس ہراڑے او زرکاری فورم آن تران آن بیدس چین وہانگ کانگ نا اہم کاروباری شخصیت آتون ہم اوڑدہی کیک۔
