اسلام آباد۔ 16مئی (اے پی پی) وزیر داخلہ چوہدری نثار علی خان تون آئی جی فرنٹیئر کانسٹیبلری بلوچستان (ساﺅتھ ) میجر جنرل سردار طارق امان سے شنبے نا دے داڑے اوڑدہی کرے ہراٹی وزیر داخلہ پارے کہ ملک انا تہہ نا و پیشن نا سیکورٹی ئِ المی جوڑ کننگ اٹی سول آرمڈ فورس آتا کوشست و قربانی تے قدرانا نظر اٹ ہرک۔ وزیر داخلہ پارے کہ صوبہ بلوچستان اٹی امن و ایمنی نا حالیت و سی پیک نا پیش نظر ایف سی نا کڑد پین اہمیت اختیار کرینے، داخلی سیکورٹی آن تعلقدار ساڑی آ دور انا چیلنج آتون مون تننگ کن المی ئِ کہ ایف سی کارندہ غاتا تربیت و کاریم نا کچ ئِ ودفنگ خاص کر ٹیکنالوجی نا گچین کاریم اٹ اتنگ آ خصوصی چکار تخنگے۔ وزیر داخلہ پارے کہ حکومت پاکستان داخلی و خارجی سیکورٹی نا بابت سول آرمڈ فورس آتا اہم کڑد ئِ مون آ تخسا اوفتا غٹ آپریشنل گرج آتے پورو کننگ و اوفتا کاریم نا کچ ئِ ودفنگ کن ہروڑنا کوشست کننگ ئِ۔ اوپارے کہ گدرینگوک آ چار سال اٹی سول آرمڈ فورس آتا پیشہ وارانہ گرج آتے پورو کننگ، کارکڑد نا پین گچینی و پوسکن آ ونگز آتا اڈ تننگ کن 80 ارب آن زیات خڑچ کننگانے ہراکہ دا ہیت انا صفا شاہدی ئِ کہ حکومت نئے بیرہ بیرہ سول آرمڈ فورس آتا خذمت آتا ستائِ کیک بلکن داٹی پین گچینی و فعالی نا خواہندار ئِ۔ اوپارے کہ ایران و اوغانستان تون اسیجائی سیم تا گچین چاروکی ، غیر کانودی انسانی ہن و بر نا توننگ ، سمگلنگ تون اوار ایلو چیلنج آتون مون تننگ کن حکومتی کہول آ چندی گام گیج کننگ انگ ئِ م، پوسکن آکراسنگ پوائنٹ نا جوڑ جاڑ تون اوار اوار سخت انگا سیمی علاقہ غاتا گچین چاروکی کن جدید ٹیکنالوجی ئِ کاریم اٹ اتنگ انگ ئِ ، دا گام گیج آتا سرسہبی کن المی ئِ کہ ایف سی نا ورناتا کاریم نا کچ ئِ ودفنگ آ خصوصی چکار تخنگے تانکہ درکار مسخت آتا دوئی ئِ ممکن جوڑ کننگ مرے۔
