پوسکن آ مالی سال اٹی ملک انا جم اٹنگا قومی پیداوار نا شرح نمو 6 درسد اسکان ودفنگ آ چکار تخنگک
اسلام آباد۔ 16مئی (اے پی پی) بنجائی وزیر خزانہ سینیٹر اسحاق ڈار پارینے کہ پوسکن آ مالی سال اٹی ملک انا جم اٹنگا قومی پیداوار نا شرح نمو 6 درسد اسکان ودفنگ آ چکار تخنگک، میکرواکنامک سوگوی آن پد بڑز شرح نمو نا دوئی آن فی کس کٹیا و روزگار نا وارخواہی ودک ہراٹی خلقت نا زند انا معیار اٹی گچینی بریک۔ جاپانی جریدہ نکئی ایشیئن رویو ئِ تینا اسہ انٹرویو اسے ٹی اوپارے کہ پاکستان انفراسٹرکچر ، چنکا کاروبار و تخفیف نیزگاری نا پروگرام تیٹی زرکاری ئِ ودفنگ کن پرعزم ئِ ، دامسخت کن جہانی شریدار آتا مخ تفی ئِ دوئی کرینے۔ اوپارے کہ میکرواکنامک سوگوی نا دوئی آن پد نن بڑز شرح نمو آ چکار تخانن ہراڑآن خلقت نا زند انامعیار اٹی گچینی بریک، فی کس کٹیا ودک، روزگا رنا وارخواہی تیٹی ودکی مریک و انفراسٹرکچر نا گرج ئِ پورو کننگ اٹی کمک رسینگک۔ اسحاق ڈار پارے کہ بروک آ مالی سال اٹی مالیاتی گام گیج و پالیسی تا بابت حکومتی کوشست آتیان گروتھ ئِ سوگوی ملک۔ وزیر خزانہ پاکستان انفراسٹرکچر بینک انا اڈتننگ اٹی شریدار نا وڑاٹ انٹرنیشنل فنانس کارپوریشن تون قول و اقرار نا حوالہ ئِ ترسا پارے کہ دا بینک انفراسٹرکچر نا ڈٹ آتے کن نجی بشخ انا کنڈآن فنانسنگ کیک، داٹی حکومت پاکستان و آئی ایف سی نا 20 درسد فی کس انا سرمایہ اتون بریبر نا شریداری مریک وخت اس کہ بنک انا اداشدہ سرمایہ نا حجم اسہ ارب ڈالر مریک۔ اوپارے کہ نن برطانیہ نا جہانی شونداری نا ادارہ و جرمن بینک انا ایف ڈبلیو نا اشتراک آن پاکستان مائیکرو فنانس زرکاری کمپنی اس ہم جوڑ کرینے۔ دا کمپنی مائیکروفنانس آن فائدہ ہرفوک آ ساڑی آ کچ 40لکھ آن اسہ کروڑ اسکان ودفک۔ اوپارے کہ نن پاکستان ڈویلپمنٹ فنڈ اس ہم قائم کرینن ہرا بجٹ آن پیشن سرکاری بشخ انا شونداری ڈٹ آتیٹی زرکاری کیک۔ اسحاق ڈار پارے کہ بجلی نا بشخ اٹی انفراسٹرکچر نا شونداری ساڑی حکومت نا اولیت ئِ ، 25000 میگاواٹ نا ڈٹ جتا مرحلہ غاتیٹی ئُ وخت اس کہ دہ ہزار میگاواٹ بجلی مارچ 2018 ءاسکان سسٹم اٹی اوار مریک۔
