پاک چین واپار اٹی خڑکی اشتراک کار”آئرن برادرز ئِ گولڈن برادرز اٹی “ بدل کننگ کیک، ایگزیکٹو چیئرمین علی بابا گروپ
ہانگ ژو۔ 16مئی (اے پی پی) وزیراعظم محمد نواز شریف پارینے کہ او اقتصادی شونداری نا کمک اٹ الس ئِ سیاسی وڑاٹ بااختیار جوڑ کننگ آ پکا یخین تخک و او چنکا کاروبار ئِ جہانی کہول اسکان دننگ اٹی کمکار ذریعہ نا وڑاٹ ملک اٹی ای کامرس نا است بڈی ئِ کیک۔ سے شنبے نا دے چین نا غٹ آن بھلا ای کامرس پورٹل ”علی بابا“ نا کنڈآن پاکستان اٹی ای پلیٹ فارم نا اڈتننگ نا بابت مفاہمت نا یات داشت آتیا دستخط نا دود اٹی وزیراعظم پارے کہ دا گام ملک اٹی روزگار ودی کننگ اٹی کمکار مریک۔ وزیراعظم چنکا و درمیانہ درجہ نا کاروبار نا بشخ اٹی گچینی اتنگ کن ای کامرس ئِ عمل انگیز گوندسا پارے کہ داڑآن راج انا پسماندہ تپہ غاتے مون آ دننگ اٹی کمک رسینگک۔ اوپارے کہ کاروبار ئِ ودفنگ و جہانی منڈی تسکان سرکننگ کن چنکا کاروبار کن ڈیجیٹل لین دین اسہ جوان ئُ ذریعہ اسے۔ وزیراعظم علی بابا نا بانی و ایگزیکٹو چیئرمین جیک ما تون اینخو سال جنوری ٹی ڈیووس اٹی اوڑدہی آن پد مروک آ اوڑدہی ئِ خوش آئند گوندسا پارے کہ او چینی الس نا شونداری کن ہندا کمپنی نا کڑد ئِ خنسا بھاز زہمی مسنے۔ اوپاکستان اٹی علی بابا نا ای پلیٹ فارم نا اڈتننگ نا عزم آ جیک ماکو نا ستائِ کرسا پارے کہ او تینا دفتر ئِ دا رداٹ باضابطہ کارروائی کننگ نا پارت کریسس ہرانا نتیجہ ٹی چار تو نا تہٹی ایم او یو آ دستخط مس۔ اواومیت ظاہر کرے کہ علی بابا گروپ زوت آن زوت پاکستان اٹی ڈٹ انا بنائِ کیک۔ جیک ما ہرا آن لائن ٹریڈ وموبائل ادائیگی تیٹی تینا سرسہبی تیا پنی ئِ، پارے کہ ای کامرس مون آ بروک آ منڈی تیٹی وارخواہی دوئی کننگ کن بھاز زیات لائخی تخک۔ اوپارے کہ چنکا کاروبار کن ای کامرس نا آخبت بھاز روشنائِ ۔اینو پگہ داوڑنا پین ادارہ غاک میدان اٹی بننگ ئُ۔ اوپارے کہ اونا کمپنی پاکستان نا ای کامرس نا بشخ انا شونداری آ نظر تخانے و او چنکا درجہ نا صنعت آتا کمک ئِ کننگ نا خواہندار ئِ۔ اووزیراعظم نا ستائِ کرسا پارے کہ علی بابا گروپ مچ آ دنیا ٹی 60ملین کمپنی تے آسراتی تننگ ئِ۔ پاکستان آن کم و ود 3لکھ صارف لین دین و کمپنی نا خذمت آتے کن علی بابا تون قول و اقرار کرینو۔ جیک ما پاکستان اٹی چنکا کاروباری ادارہ غاتا ستائِ کرسا پارے کہ ملک انا جہانی شہرت یافتہ مصنوعات خاص وڑاٹ فٹ بال و ہمالیائی گلابی نمک قابل ذکر ئِ۔ اوداہیت آ زور شاغا کہ پاکستان نا اِرا تہائی آبادی یعنی ورناتیا خصوصی چکار تخسا قومی معیشت ئِ پین سوگوی تننگ مریک۔ اوپارے کہ پاکستان و چین نا نیام اٹ واپار اٹی خڑکی اشتراک کار ”آئرن برادرز ئِ گولڈن برادرز اٹی “ بدل کننگ کیک۔ وزیر واپار خرم دستگیر ، چین اٹی پاکستان نا سفیر مسعود ملک و پاکستان اٹی چین نا سفیر سن وائی ڈونگ ئسک ہم داوخت آ ساڑی ئسر۔
