ہانگ ژو۔ 16مئی (اے پی پی) وزیراعظم محمد نواز شریف سے شنبے نا دے ژی جیانگ صوبہ ٹی واقع ای کامرس نا بشخ اٹی خذمت فراوان کروک آ چین انا بھلا ادارہ علی بابا گروپ نا ہیڈ کوارٹر نا دورہ ئِ کرے۔ داوخت آ وزیر اعظم تون اوار وزیر واپار انجینئر خرم دستگیر خان ہم ساڑی ئس۔ ہیڈ کوارٹر آ سرمننگ آ علی بابا گروپ نا ایگزیکٹوچیئرمین جیک ما وزیراعظم ئِ بخیر کرے و اودے پارے کہ 1999ءٹی اڈ ہلوک آ کمپنی داسہ دنیا نا غٹ آن بھلا آن لائن کمپنی نا درجہ دوئی کرینے۔ وزیراعظم علی بابا میوزیم نا دورہ ئِ کرے ہراڑے اودے کمپنی نا تاریخ و پروفائل نا بابت سرجم احوال آتیان معلومدار کننگا۔ داوخت آ علی بابا گروپ نا ایگزیکٹو چیئرمین پارے کہ کمپنی ہردے ئی 18 ارب ڈالر نا ریونیو دوئی کننگ نا ریکارڈ اس قائم کرینے۔ داوخت آ وزیراعظم محمد نواز شریف پارے کہ علی بابا تینا دنگ ئِ آن لائن واپار آن بیدس دیہی معیشت ، مائیکرو فنانسنگ، مارکیٹنگ ، الس نا شرحلی ، ہردے ئی زند انا سائنسز و ٹریفک ئِ کنٹرول کننگ اسکان ودفینے و مچ آ دنیا ٹی کمپنی نا 33 ہزار بنجا کاریم کننگ ئُ ہراستاکڑزرہ۔ جیک ما وزیراعظم ئِ پارے کہ کمپنی نا صارف آتا کچ 2ارب آن زیات ئِ وخت اس کہ کمپنی اسہ سد ملین بندغ ئِ روزگار ہم فراوان کننگ ئِ۔ علی بابا گروپ نا سروک مستی پارے کہ مائیکرو فنانس نا کاروبار اٹی کمپنی نا ریکوری نا کچ 99 درسد ئِ ہراڑآ وزیراعظم پارے کہ چنکا ادارہ غاتا ڈیفالٹ نا کچ بھاز کم مریک۔ تینا حکومت نا مثال ئِ ترسا پارے کہ ییلو کیب اسکیم اٹی وام تا پدی تننگ نا کچ 94درسد آن زیات مسنے۔ وزیراعظم ئِ پاننگاکہ علی بابا کمپنی ہردے چین اٹی کم و ود 60ملین پارسل بشخ وپانٹ کیک۔ وخت اس کہ ماﺅنٹ ایوریسٹ تون اوار دنیا نا سخت کسرانگا علاقہ غاتیٹی ہم کمپنی گڑاتا ترسیل نا فرض ئِ سرانجام تننگ ئِ و علی بابا نا ہلوک آک دنیا نا 200 آن زیات ملک آتیٹی ساڑی ئُ۔ داکان پد وزیراعظم ئِ کمپنی نا کارکڑد ، اونا سرسہبی و آخبت نا ہدف آتا بارواٹی ہم سرجم بریفنگ ہم تننگانے۔
