پاک چین نا سنگتی ہرآزمائش آ پوروسلیسونے
ہانگ ژو۔ 16مئی (اے پی پی) وزیراعظم محمد نواز شریف پارینے کہ پاک چین نا سنگتی ہرآزمائش آ پورو سلیسونے ومچ آ ڈیہہ و ہڑتوم آ ملک آتا الس نا فائدہ ٹی پین سوگو مننگ ئِ۔ چین نا کیمونسٹ پارٹی نا ژی جیانگ صوبائی کمیٹی نا سیکرٹری چی جن سے شنبے نا دے وزیراعظم تون اوڑدہی کرے۔ داوخت آ ہڑتوم آ راہشون تیٹی پاکستان و چین نا نیام اٹ ہڑتوم آ کنڈآتا تعلقداری و تین پہ تینی مفادنا معاملہ غاتیا خیال آتا درشانی ئِ کریر۔ وزیراعظم محمد نواز شریف پارے کہ پاکستان و چین نا ایلمی فولاد آن ہم سوگو ئِ و غٹ جہانی فورم تیا تین پہ تینی کمکاری نا دنگ اٹی وسعت نا عمل برجاسلک۔ اوپارے کہ چین پاکستان اقتصادی راہداری (سی پیک) چین نا صدر شی جن پنگ نا ون بیلٹ ون روڈ نا نظریہ نا عکاسی ئِ کیک۔ اوپارے کہ ہڑتوم آ ملک آک الس نا شرحالی ، شونداری و شونہالی کن یکجائُ۔ کمیٹی نا سیکرٹری چی جن وزیراعظم ئِ بخیر کرسا پارے کہ پاکستان و چین نا تعلقداریک تاریخ و دودوربیدہ غا قائم ئُ و ہڑتوم آ قومک الس نا الس تون رابطہ غاتا کہول آ ہڑتوم آ کنڈآتا تعلقداری و کمکاری ئِ پین ودفنگ ئُ۔ اووزیراعظم ئِ ژی جیانگ صوبہ نا اقتصادی شونہالی نا بارواٹی پارے کہ دا صوبہ اقتصادی سرجزآتا بنجائِ و تاریخی وڑاٹ شاہراہ ریشم نا بشخ اسے۔ چی جن پارے کہ پاکستان و چینی صوبہ ژی جیانگ نا کاروباری برادری نا سوگو تعلقداری ئِ۔ اوپارے کہ واپاری کمکاری ٹی پین ودکی نا گرج ئِ۔ اواومیت ظاہر کرے کہ محمد نواز شریف نا دورہ غان چین و ژی جیانگ صوبہ نا تین پہ تینی واپار نا سوگوی آن ہڑتوم آ ملک آتا ہڑتوم آ کنڈآتا رابطہ غاتا سوگوی ٹی کمک رسینگک۔
