بیجنگ۔15مئی (اے پی پی) وزیراعظم محمد نواز شریف پارینے کہ چین نا ون بیلٹ روڈ ڈٹ آن ڈیہہ ٹی دہشت گردی، ہن و بر و خور و دیر انا کاختی کون آ خلیس آتامون ئِ توننگ اٹی کمک رسینگک۔ او دوشنبے نا دے داڑے بیلٹ اینڈ روڈ فورم اٹی خڑکی شریداری کن ہم آہنگی نا پالیسی نا سرحال آ لیڈرز گول میز کانفرنس نا بنائی سیشن آن تران کریکہ۔ اوپارے کہ ون بیلٹ ون روڈ خاہوتی و جہانی برادری ئِ تینا گام گیج آتے ہم آہنگ بایدے کروئی مرے تانکہ کمکاری کن گنجائشت ئِ ودفنگ مرے۔ وزیراعظم بیلٹ روڈ انا روٹ آن پیشن اقوام آتون مذاکرات و رابطہ غاتا گرج آ زورشاغا۔ وزیراعظم محمد نواز شریف پارے کہ پاکستان راجی و اقتصادی شونداری و انسانی شونہالی کن ڈیہہ تیان مون آ کمکاری و ہم آہنگ شریدارآتا پبی مخ تفی ئِ کیک۔ اوجہانی ادارہ غاتا کہول آ پالیسی اہم آہنگی نا گرج آ زورشاغا و پارے کہ چندی قومی ڈٹ بندی نا ادارہ، اقوام متحدہ ، جہانی کانفرنس و علاقائی تنظیمک جہانی معاملہ غاتیا ڈٹ و گام گیج کرینو و ون بیلٹ ون روڈ اتون شریداری تے اڈ تسنو۔ اوپارے کہ بریٹن ووڈز انسٹیٹیوشنز و ایشیائی انفراسٹرکچر اینڈ انوسٹمنٹ بینک ئِ علم آتا ہن و بر، ڈویلپمنٹ فنانسنگ و ملکی کہول آ ہم آہنگی کن کمکاری ئِ پین بایدے سوگو جوڑ کروئی مرے۔ وزیراعظم پارے کہ لیڈرز راﺅنڈ ٹیبل پالیسی ہم آہنگی ون بیلٹ ون روڈ انا رداٹ کمکاری ئِ ودفنگ نا کسر پٹنگ و داوخت اسکان نا پیش رفت نا جاچ ئِ ہلنگ نا موقع فراوان کیک۔ وزیراعظم پارے کہ جہانی معیشت اٹی گچینی نا اشارہ غاک پاش مننگ ئُ و دابابت پت انا قابل پیشن گوئیک ئُ کہ جہانی واپار و کاروبار سوگو مریک ولے چندی نزوری تا بناءآ دا سمااف کہ دا بحالی اخہ وخت اسکان سلک۔ نواز شریف پارے کہ جہانی معیشت اٹی اِرا بھلو مسابقتی رجحان ئُ ہرافتے ٹی پروٹیکشن ازم انا وکالت و پائیدار شونداری کن وسیع تر اقتصادی کمکاری نا ودوک آ خواست اوارئِ۔ اوپارے کہ دا ڈٹ ئِ ایشیائی انفراسٹرکچر انوسٹمنٹ بینک و سلک روڈ فنڈ انا پورو مخ تفی دوئی ئِ۔ اقوام متحدہ نا ادارہ و علاقائی تنظیمک ون بیلٹ ون روڈ انا رداٹ ڈٹ جات آتے امنا کرینے۔ وزیراعظم نواز شریف پارے کہ چین پاکستان اقتصادی راہداری نا رداٹ انفراسٹرکچر ، توانائی، صنعتی زونز و ٹیلی کمیونیکیشنز نا بشخ آتیٹی فعال شرکت نا کمک اٹ چنکو وخت اسے ٹی شاندار پیش رفت کرینے۔ اوعلاقائی و جہانی کہول آتیا شونداری حکمت عملی تیٹی پین ہم آہنگی نا گرج آ زور شاغا و پارے کہ داڈٹ بایدے غٹ اکن فائدہ مند مرے۔ نواز شریف پارے کہ نن چین انا داتاریخی گام انا ستائِ کینہ ہرادے داسہ غٹ شریدار ملک آتا پورو اونر شپ دوئی مریک۔ اوپارے کہ پاکستان اٹی حکومت مسہ کہول آتیا ہم آہنگی آ چکار تخنگ ئِ ہرافتے ٹی قومی شونداری ڈٹ آتے پاک چین اقتصادی راہداری آن ہم آہنگ کننگ، سی پیک نا ڈٹ بندی و عملدرآمد کن چین اتون خڑکی رابطہ کاری و پالیسی نا بابت جہانی مالیاتی ادارہ غاتون رابطہ غاتا اڈتننگ اوار ئِ۔ وزیراعظم پارے کہ فورم ئِ ون بیلٹ ون روڈ آ امنائی ئِ ودفنگ، شونداری و عملدرآمد نا بشخ اٹی کمکاری ئِ ودفنگ و مریس وختی کمکاری کن لائحہ عمل اس تیار کننگ آ بایدے چکار تخنگے۔
