اسلام آباد۔ 04 جنوری (اے پی پی) پاکستان بھارتی وزیرخارجہ نا کنڈآن خلوک آ سٹی و فضول دوبہ غاتے مسترد کرسا پارینے کہ داوڑنا بیانک پاکستان ءِ بدنام کننگ و تنیا کننگ اٹ بھارت نا بے سہبی آ ودوک آ مایوسی نا ڈیک ءِ۔ بھارتی وزیر خارجہ نا کنڈآن پاکستان نا برخلاف ساڑی آ بیان تا چرجوئی ٹی میڈیا نا سوج آتا ورندی ءِ ترسا ترجمان دفترخارجہ پارے کہ پاکستان بھارتی وزیر خارجہ نا کنڈآن خلوک آ سٹی و فضول دوبہ غاتے مسترد کیک۔ ترجمان پارے کہ تدوک آ کیہی سال آن ، بھارت مظلومیت نا فرضی داستان و پاکستان مخالف پروپیگنڈا نا کمک اٹ جہانی برادری ءِ گمرہ کننگ ناناپاک مہم اٹی لگوک ءِ، دا چرجوئی داسہ بایدے بند مرے۔ پدریسہ پاکستان مخالف بیانیہ پاکستان نا گل زمین آ دہشت گردی ءِ تہو تننگ اٹ بھارت نا ڈھیٹی اٹ اوار مننگ نا حقیقت ءِ اودیم کننگ کپک و نئے بھارت نا غیرکانودی کوزہ ٹی جموں وکشمیر اٹی ریاستی سرپرستی ٹی مروک آ دہشت گردی آ پڑدہ شاغنگ کیک۔ ترجمان پارے کہ ایلوفتیا ہورہرفنگ نا جاگہ غا بھارت تینٹ دہشت گردی، تخریب کاری و پاکستان نا برخلاف جاسوسی ٹی اوار مننگ نا چرجوئی ءِ بند کے۔ بیرہ منہ ہفتہ مست اسہ ڈوزیئر اس جاری کننگاسس ہراٹی ناقابل تردید شاہدی ساڑی ئسک ہراکہ 2021 اٹی لاہور نا اسہ پرامن خلق اسے ٹی مروک آ دہشت گردانہ جلہو اٹی بھارت نا اوار مننگ ءِ پک کیک۔ 2007 نا سمجھوتہ ایکسپریس سانحہ ٹی بھارتی گل زمین آ 40 آن زیات پاکستانی شاری تا زوال کننگ آن ہلیس 2016 ٹی بھارتی بحریہ نا حاضر سروس کمانڈر کلبھوشن یادیو نا پاکستان نا تہہ آن دزگیری اسکان، دہشت گردی و تخریب کاری ٹی بھارت نا اوار مننگ نا ناقابل تردید شاہدی ساڑی ءِ۔
