اسلام آباد۔ 04 جنوری (اے پی پی) ملک انا واپاری نسخان اٹی برجامالی سال انا اولیکو 6 تُو اٹی سالانہ بنداو تیا 32.6 درسد نا کمتی ریکارڈ کننگانے۔ قومی ادارہ شماریات نا کنڈآن دا بابت جاری کروک حساب وکتاب نا رداٹ جولائی آن ہلیس دسمبر اسکان نا مد اٹی واپاری نسخان نا کچ 17.13 ارب ڈالر ریکارڈ کننگا ہراتدوک آ مالی سال انا ہندا مد انا مقابلہ ٹی 32.6 درسد کم ءُ۔ تدوک آ مالی سال انا ہند امد اٹی واپاری نسخان نا کچ 25.44 ارب ڈالر ریکارڈ کننگاسس۔ دسمبر 2022 اٹی 2.86 ارب ڈالر نا واپاری نسخان ریکارڈ کننگا ہرا نومبر نا مقابلہ ٹی 2.4 درسد زیات و تدوک آ سال دسمبر نا مقابلہ ٹی 40.7 درسد کم ءُ۔ نومبر اٹی واپاری نسخان نا کچ 2.79 ارب ڈالر و تدوک آ سال دسمبر اٹی 4.82 ارب ڈالر ریکارڈ کننگاسس۔ حساب وکتاب نا رداٹ برجامالی سال انا اولیکو 6 تُو اٹی ملکی برآمد آتیٹی سالانہ بنداو تیا 5.8 درسد نا کمتی ریکارڈ کننگا۔ جولائی آن دسمبر 2022 اسکان نا مد اٹی برآمد آتیان 14.25 ارب ڈالر نا زرمبادلہ دوئی مس ہراتدوک آ مالی سال انا ہندا مد اٹی 15.13 ارب ڈالر ئسر۔ دسمبر اٹی برآمد آتیٹی سالانہ بنداو تیا 16.6 درسد نا کمتی ریکارڈ کننگا۔ دسمبر اٹی ملکی برآمد آتا کچ 2.30 ارب ڈالر ریکارڈ کننگا ہرا تدوک آ سال دسمبر اٹی 2.76 ارب ڈالر ئسر۔ حساب وکتاب نا رداٹ برجامالی سال انا اولیکو 6 تُو اٹی ملکی درآمد آتیٹی سالانہ بنداو تیا 22.6 درسد نا کمتی ریکارڈ کننگا۔ مالی سال انا اولیکو شش تُو اٹی درآمد آتیا 31.38 ارب ڈالر نا زرمبادلہ خڑچ مس ہرا تدوک آ مالی سال انا ہند امد اٹی 40.56 ارب ڈالر ئسر۔ دسمبر اٹی ملکی درآمد آتیٹی سالانہ بنداو تیا 31.9 درسد نا کمتی ریکارڈ کننگا۔ دا مد اٹی درآمد آتیا 5.16 ارب ڈالرنا زرمبادلہ خڑچ مس ہرا دسمبر 2021 اٹی 7.58 ارب ڈالر ئسر۔
