پنچ آن دُوانزدہ سال نا چناتا 100 درسد ویکسی نیشن ءِ پک، سیمی کسر، بالی پٹ آتیا سکریننگ ءِ پین گچین کننگے، وزیراعظم

اسلام آباد۔ 03 جنوری (اے پی پی) وزیراعظم محمد شہباز شریف پارینے کہ اللہ نا فضل و کرم اٹ پاکستان اٹی کوویڈ۔ 19 نا حالیت آک قابوٹی ءُ، پنچ آن دُوانزدہ سال انا چناتا 100 درسد ویکسی نیشن ءِ ہلہلہ ئی بنداو تیا پک و پاکستان نا سیم و بالی پٹ آتیا ہن و بر آ سکریننگءِ پین گچین کننگے۔ داخیال آتا درشانی ءِ او تینا کماشی ٹی ملک اٹی کوویڈ۔ 19 نا حالیت آتا جاچ  دیوان آن تران کرسا کرے۔ دیوان ءِ ڈیہہ تون اوار مچ آ دنیا و پاکستان اٹی داوخت آ کوویڈ۔ 19 نا حالیت، کورونا دین انا پوسکن آ وڑ، اوفتا توننگ کن کروک آ گام گیج و ویکسی نیشن نا بابت سرجمی اٹ معلومدار کننگا۔ وزیراعظم پارے کہ اللہ نا فضل و کرم اٹ پاکستان اٹی کوویڈ۔ 19 نا حالیت آک قابوٹی ءُ۔ وزیراعظم پارت کرے کہ پنچ آن دُوانزدہ سال انا چناتا 100 درسد ویکسی نیشن ءِ ہلہلہ ئی بنداو تیا پک و پاکستان نا سیم و بالی پٹ آتیا ہن و بر آ سکریننگ ءِ پین گچین کننگے۔ سیم و بالی پٹ آتیا سکریننگ نا نظام ءِ تھرڈ پارٹی جاچ پڑتال کرسا رپورٹ پیش کننگے۔ وزیراعظم پارے کہ پاکستان اٹی تدوک آ 15 ہفتہ ٹی کوویڈ۔ 19 آن اسہ مرک اسے نا ہم مفننگ ستاکڑزوک ءُ ہیت اسے۔ کنتون اوار مچ آ قوم ویکسین عطیہ کروک آ ملک آتا منت وار ءُ۔ کوویڈ۔ 19 انفیکشن نا کم کچ ستاکڑزک ولے ننے ہر وخت تیار رہینگوئی مریک۔ کوویڈ۔ 19 نا تالانی ءِ توننگ کن گام گیج کروک آ غٹ عہدیدار و این سی او سی نا کوشست ستاکڑزک۔ دیوان ءِ پاننگاکہ کوویڈ۔ 19 نا پوسکن آ وڑآن پاکستان ءِ بظاہر ہچ ءُ خطرہ اس اف انتئے کہ پاکستان نا 90 درسد آبادی پورووڑاٹ و 95 درسد آبادی جزوی وڑاٹ ویکسینیٹڈ ءِ۔ 5 آن 12 سال انا مسہ کروڑ 50 لکھ چناتیٹی ویکسی نیشن نا کچ 25 درسد ءِ وخت اس کہ دادے بروک آ تُوتیٹی 100 درسد کننگک۔ پاکستان اٹی انفیکشن نا اوسط کچ 0.2 آن 0.5 درسد ءِ و تدوک آ 15 ہفتہ غان کوویڈ۔ 19 آن ہچ ءُ مرک اس متنے ۔ دیوان ءِ مستی پاننگاکہ کوویڈ۔ 19 نا پوسکن آ وڑتا تالانی ءِ توننگ کن سیمی کسر تیا گچین بست وبند کننگانے۔ داڑتون اوار اوار بالی پٹ آتیا رینڈم سیمپلنگ نا کچ ءِ ودفسا 2 درسد کننگانے و زہمی ملک آتیان بروک آجہاز آتا فیومیگیشن اتون اوار اوار مسافر آتا سکریننگ ءِ ہم پین گچین کننگانے۔ دیوان ءِ پاننگاکہ حکومت نا گام گیج و وزیراعظم ناخصوصی چکار نا سوب پاکستان دنیا نا ہمو منہ آتیان اسٹ ءِ ہراٹی جینوم سرویلنس ءِ پک کننگانے ہرانا سوب آن بھاز زوت دین انا پوسکن وڑتا پیدواری  ممکن مریک ۔ وزیراعظم وزارت نیشنل ہیلتھ سروسز، این سی  او سی کمامدار و سول ایوی ایشن کمامدارآتا کوویڈ۔ 19 نا توننگ نا گامگ گیج آتا ہم ستاءِ کرے۔