صدر مملکت نا بنجائی اردو یونیورسٹی ءِ طالب علم نا ٹرانسکرپٹ و ڈگری ءِ15 دے اٹی جاری کننگ نا پرمان

اسلام آباد۔ 03 جنوری (اے پی پی) صدر مملکت ڈاکٹر عارف علوی بنجائی اردو یونیورسٹی نا کنڈآن طالب علم نا ٹرانسکرپٹ و ڈگری ءِ توننگ آ ترندی نا درشانی  ءِ کرسا 15 دے انا تہہ ٹی ڈگری ءِ جاری کننگ ناپارت کرینے، او بنجائی محتسب نا فیصلہ نا برخلاف پاکستان بیت المال نا درخواست ءِ مسترد کرے۔ سے شنبے نادے آ ایوان صدر نا پریس ونگ آن جاری بیان نا رداٹ صدر مملکت ڈاکٹر عارف علوی بنجائی اردو یونیورسٹی نا کنڈآن طالب علم نا ٹرانسکرپٹ و ڈگری ءِ توننگ آ ترندی نا درشانی ءِ کرے۔ اویونیورسٹی ءِ 15 دے انا تہہ ٹی طالب علم ءِ ڈگری جاری کننگ نا پارت کرے۔ صدر مملکت پاکستان بیت المال ءِ زہمی طالب علم نا غاوتا چٹفنگ نا ہم پارت کرے۔ طالب علم ءِ بنجائی اردو یونیورسٹی و پاکستان بیت المال نا نیام اٹ ضابطہ نا کارروائی ٹی ہرے نا سوب آن ٹرانسکرپٹ و ڈگری تننگتوکہ۔ صدر مملکت پارے کہ لیٹ فیس انا ادائیگی  نا بانداات ءِ ایسر کننگ نا جاگہ غا یونیورسٹی غیر منصفانہ وڑاٹ طا لب علم نا ڈگری و ٹرانسکرپٹ ءِ تورے، پاکستان بیت المال نا کنڈآن فیس براہ راست یونیورسٹی ءِ اداکننگاکہ، ادائیگی ٹی طالب علم نا ہچ ءُ عمل دخل اس اَلوکہ۔ صدر مملکت پارے کہ یونیورسٹی ءِ جوان سمائسک کہ طالب علم احساس سکالر شپ پروگرام نا رداٹ تعلیم دوئی کریکہ۔ طالب علم عبادالرحمان (غاوتروک) بی بی اے نا ڈگری و ٹرانسکرپٹ نا جاری کننگ کن بنجائی محتسب ءِ اپیل کریسس۔ یونیورسٹی 122،500 روپئی نا بقایہ جات آتا ادامفننگ نا سوب آن ڈگری ءِ توریسس۔ بنجائی محتسب طالب علم نا حق اٹی فیصلہ کرسا بیت المال ءِ باندات ءِ ایسر کننگ نا پرمان کریسس، بیت المال فیصلہ نا برخلاف صدر مملکت ءِ درخواست دائر کرے ہرادے مسترد کننگا۔