اسلام آباد۔ 03 جنوری (اے پی پی) تدوک آ سال اٹی پاکستان سفارتی پڑآ قابل ذکر سرسہبی دوئی کرے، پاکستان ءِ ایف اے ٹی ایف اینٹی منی لانڈرنگ گرے لسٹ آن کشنگا و سی اوپی 27 اٹی جہانی امور آ پاکستان نا چندی موقف نا بھلو کچ اسے آ ستاءِ کننگا و اونا مخ تفی ءِ کننگا۔ چینی میڈیا سے شنبےنادے آ جاری رپورٹ اٹی پارے کہ پاکستانی راہشونک چین اتون اوار سنگت ملک آتا سرسہب دورہ کریر، یقینا داسال ہم بھاز انگا خوشی و خوشگوار یات آک پاکستان نا چاری مریرہ، پاکستانی الس نا پسندیدہ کرکٹ نا گوازی پورو وڑاٹ بحال مس، آسٹریلوی و انگلش کرکٹ ٹیمک سرسہبی اتون پاکستان نا دورہ ءِ کریر و پاکستانی قومی ٹیم اتون اواری اٹ پاکستانی الس کن شاندار میچ پیش کریر۔ ہندا سال کامن ویلتھ گیمز اٹی پاکستان اِرا طلائی تمغہ کٹا ہرا است بڈ ئسر، 2023ء پوسکن ءُ وارخواہی ایسونے۔ رپورٹ اٹی پاننگاکہ اینخو سال پاکستان اٹی لس گچین کاری کون آ اہم واقعہ غاتا اسہ چرجوئی اس مون تروک مریک و پاکستانی الس ءِ اومیت ءِ کہ پوسکن آ سال اٹی آفت آتیان پد پوسکن تفنگ نا کاریم اٹی ترندی بریک، ملک کرار کرار آ سیاسی سوگوی نا کنڈا کاہک، و راجی و زرگزرانی شونداری برجاسلک، و پاک چین اقتصادی راہداری ڈٹ ءِ ترند رفتار پیش رفت دوئی مریک، ہراڑان پاکستانی الس ءِ پین فائدہ دوئی مریک۔ وخت و زمانہ دیر آنبار اسُل سلپسہ، مستین بس آخبت نا دیباچہ ءِ۔ ببو پوسکن آ سال انا وخت آ چینی و پاکستانی الس نا خوشی تیکن دعا کین، ببو اواری اٹ خواری کین، تینا ملک و قوم انا آخبت کن، ہڑتوم آملک آتا نیام اٹ آہنی سنگتی کن، و چین پاکستان ہم نصیب راج انا آخبت کن، انتئے کہ دا ہڑتوم آ الس نا اسیجائی اومیت و تغ تے درسا چلینگک۔
