چیئرمین این ڈی ایم اے نا اسٹیک ہولڈر آتے نوکاپ آن زہمی علاقہ غاتیٹی بحالی کن مربوط کوشست آتے برجاتخنگ نا پارت

اسلام آباد۔ 03 جنوری (اے پی پی) وزارت رکھ خور و پٹ وپول نیشنل ایمرجنسی آپریشنز سینٹر (این ای او سی ) ءِ پارینے کہ داسال 1.2 ملین ایکڑ رقبہ غا ہنین آ تیل و روشن گڑدان نا دسنگ ناکساس ءِ خلنگانے، سندھ اٹی کم وود 80 درسد دسنگ نا ہدف دوئی کننگانے۔ سے شنبے نادے آ  نیشنل ایمرجنسی آپریشنز سینٹر نا دیوان چیئرمین این ڈی ایم اے لیفٹیننٹ جنرل انعام حیدر ملک نا کماشی ٹی اڈ ہلک۔دیوان اٹی وزارت رکھ خور و پٹ وپول، وزارت قومی جان جوڑی، محکمہ موسمیات (پی ایم ڈی) ، نیشنل ہائی وے اتھارٹی (این ایچ اے) ، نیشنل انفارمیشن ٹیکنالوجی بورڈ (این آئی ٹی بی )، صوبائی ڈیزاسٹر مینجمنٹ اتھارٹیز (پی ڈی ایم اے)، و جی بی و سندھ انا محکمہ آبپاشی نا نمائندہ غاک بشخ ہلکر۔ دیوان اٹی صوبائی ڈیزاسٹر مینجمنٹ اتھارٹیک تینا صوبہ غاتا نوکاپ آن زہمی علاقہ غاتیٹی ریلیف و بحالی نا سرجزآتیا حوال تسر۔ محکمہ آبپاشی سندھ پارے کہ دریائے سندھ انا دامون ایمون کنارہ غان 95 درسد نوکاپی دیر ءِ کشنگانے۔ محکمہ موسمیات موسم نا منظرنامہ ءِ پیش کرسا پارے کہ ملک انا گیشتر علاقہ غاتیٹی جنوری نا اولیکو ہفتہ یخ سلک، وخت اس کہ قطبی و دے ٹکی پنجاب اٹی گوتلو نا راج  مریک۔ دیوان اٹی وزارت قومی جان جوڑی نوکاپ آن زہمی لیڈی ہیلتھ ورکرآتیکن اُراتا تفنگ نا بابت پیش رفت آن بشخ ہلوک آتے معلومدار کرے۔ این ایچ اے بلوچستان اٹی لنڈاپول انا بحالی نا بابت دیوان ءِ حوال ترسا پارے کہ پنجر نا نظرثانی مروک ڈیزائننگ ءِ پورو کننگانے و تنصیب نا عمل برجاءِ۔ این آئی ٹی بی امداد فراوان کننگ کن ڈیجیٹل ایپلی کیشن آ بزغرآتا رجسٹریشن نا بارواٹی معلومدار کرے۔ چیئرمین این ڈی ایم اے نوکاپ آن زہمی علاقہ غاتیٹی بحالی و پوسکن تفنگ نا برجا ڈٹ آتیٹی پیش رفت آ است جمی نا درشانی ءِ کرے۔ اوتعلقدار اسٹیک ہولڈر آتے پارت کرے کہ او نوکاپ آن زہمی علاقہ غاتیٹی بحالی نا کاریم ءِ ترندی اٹ سرتننگ کن مربوط کوشست آتے برجاتخر۔