اسلام آباد۔ 02 جنوری (اے پی پی)صدر مملکت ڈاکٹر عارف علوی پارینے کہ اوورسیز پاکستانیک تینا آبائی علاقہ غاتا مخلوق تون خڑکی و سوگو رابطہ غاتے برقرار تخر، سمندر پار پاکستانیک تینا ذہانت، مہارت ، آزموندہ و زرکاری اٹ آبائی علاقہ غاتا راجی ، زرگزرانی و اقتصادی حالیت آتے گچین جوڑ کیر۔ داخیال آتا درشانی ءِ او دوشنبے نادے آ برطانیہ و امریکہ ٹی رہینگوک آ پاکستانی پردیسی تا ڈل اسے تون اوڑدہی ٹی کرے۔ ڈل اٹی لارڈ قربان حسین، لارڈ واجد خان، عمران حسین، یاسمین ڈار، کامران حسین، ارشد رچیال، راجہ نجابت حسین، ماجد نذیر، امان مجید ، حماس مجید، طاہر ہ محمد، نواب الدین، سید علی کامران کرمانی، شکور احمد، نقاش مشتاق دیوان، شیرباز منیر چوہدری، محفوظ اللہ، شرافت اللہ، ساجد خان، ندیم احمد خان، بریگیڈیئر (ر) افتخار علی خان، افضل بٹ و خبیب فاؤنڈیشن نا عہدیدار آک اوار ئسر۔ ڈل اتون گپ وتران کرسا صدر مملکت پارے کہ اوورسیز پاکستانیک تینا آبائی علاقہ غاتا مخلوق تون خڑکی و سوگو رابطہ غاتے برقرار تخر، سمندر پار پاکستانیک تینا ذہانت ، مہارت، آزموندہ و زرکاری آن آبائی علاقہ غاتا راجی، زرگزرانی و اقتصادی حالیت آتے گچین جوڑ کیر۔ اوپارے کہ سمندر پار پاکستانیک پاکستان نا تاثر ءِ گچین کننگ کن گام گیج کیر۔ ڈاکٹر عارف علوی پارے کہ بھارت نا غیرکانودی کوزہ ٹی جموں وکشمیر اٹی انسانی حق انا خلاف ورزی و بھارت اٹی اقلیت تیا مروک آ ظلم و ستم ءِ تالان کیر، مچ آ دنیا ٹی رہینگوک آ پاکستانیک اسہ اہم ءُ میرات اسے ءُ، تینا خواری، علم و ذہانت اٹ تینا مہماندار ملک آتا شونداری و شونہالی ٹی بشخ شاغنگ ءُ۔ اوپارے کہ ڈل انا باسک آک تینا علم، عقل و مہارت ءِ پاکستان اٹ خوانوک و بڑزکو آب انا انسانی وسیلہ غاتے برقرار تخنگ کن کاریم اٹ اتیر ۔ صدر مملکت تدوک آ منہ تُو تیٹی 7 لکھ آن زیات تعلیم یافتہ و کسبکار انسانی وسیلہ غاتا پیشن نا ملک آ ہِننگ نا میڈیا رپورٹ آتیا گڑتی نا درشانی ءِ کرے۔ اوپارے کہ دُن تو پاکستان ءِ مشکل زرگزرانی و مالیاتی حالیت مون تروک ء، ولے اوفتا مون ءِ توننگ مریک۔ صدر مملکت پارے کہ پاکستان نا کم وود 40 سال اسکان 40 لکھ اوغان باہوٹ آتا مہمانداری نا شاندار ریکارڈ ءِ ، یوکرین اٹی ساڑی آ جنگ آن باہوٹ آتون امتیازی سلوک نا واقعہ غاک مون آ بسر، یوکرین نا باہوٹ آتے یورپی یونین نا ملک آک بخیر اٹ پاننگ اٹی ءُ وخت اس کہ دنیانا ایلو بشخ آتیان بروک آ باہوٹ آتے دا ملک آتیان کشنگا و سمندر اٹ ڈبیفنگا۔ ڈاکٹر عارف علوی پارے کہ اقوام متحدہ نا جوڑ کننگ نا بنداوی مسخت مچ آ دنیا ٹی جھیڑہ غاتے کم کننگ ئس، بدبختی اٹ جھیڑہ غاک زیات تر یورپ اٹی کم مسر وخت اس کہ دنیا نا ایلو بشخ خاص وڑاٹ مسلمان ملک آتیٹی جھیڑہ غاتیٹی ہچ ءُ کمتی اس بتو، اقوام متحدہ عراق، شام، لیبیا و اوغانستان و دنیا نا ایلو بشخ آتیٹی جنگ و جھیڑہ غاتے توننگ کتو، دا جنگ آک شون ہلوک دنیا نا مخصوص مسخت آتا دوئی کننگ کن غلط معلومداری، جعلی خبر و غلط معلومداری تالان کرسا کننگار۔ اوپارے کہ بھارت نا غیرکانودی کوزہ ٹی جموں وکشمیر نا ویل غٹ آن متکن ءِ، داسکان اقوام متحدہ نا سلامتی کونسل نا چندی قرارداد آتیا عملدرآمد نا چاری ءِ۔ صدر مملکت بھارت اٹی اسلاموفوبیا و انتہاپسند ہندوتوا نا فلسفہ نا ودوک آ ریسہ ناذکر ءِ کرسا پارے کہ بھارت اٹی مذہبی انتہاپسندی عروج آٹی ءِ، ہندوتوا غان زہمی گیشتری ہندوآبادی ءِ ملک انا غٹ مذہبی یا نسلی اقلیت آتیا برخلاف بش کننگ انگ ءِ، ہندوستان اٹی اقلیت آتون اوفتا مذہب نا بنداو آ امتیازی سلوک کننگ انگءِ۔ اوپارے کہ سمندرپار پاکستانی تا فرض ءِ کہ او بھارتی سیکورٹی فورس آتا کنڈآن کودک کشمیری تا برخلاف کروک آ ظلم آتے تالان کیر۔
