اسلام آباد۔ 02 جنوری (اے پی پی) بنجائی وزیر جان جوڑی عبدالقادر پٹیل پارینے کہ پولیو ورکرآک مدام تینا فرض آن زیات پاکستان نا خذمت ءِ کرینو، ساڑی آ وخت اٹی ترند یخ انا حالیت آتیٹی اوفتا اُراتا پوسکن تفنگ اٹ اوفتے تون تفنگ بھاز المی ءِ۔ داخیال آتا درشانی ءِ او قومی ایمرجنسی آپریشنز سینٹر اٹی مروک آ دیوان نا کماشی ءِ کرسا کرے۔ داوخت آ بنجائی وزیر جان جوڑی بلوچستان، خیبرپختونخوا، و پنجاب نا ایمرجنسی آپریشنز سینٹرز نا کوآرڈی نیٹر آتے چیک تس۔ سندھ اٹی نوکاپ آن زہمی 22 ضلع غاتیٹی فرنٹ لائن ورکرآتا مالی امداد نا عمل پورو مسنے۔ بنجائی وزیر جان جوڑی عبدالقادر پٹیل نوکاپ آن زہمی مروک آ پولیو ورکرآتیکن چیک تس۔ بنجائی وزیر جان جوڑی قومی ایمرجنسی آپریشن سینٹر نا عملہ ءِ پارے کہ سال انا دااولیکو کاریم نا دے، ای پاکستان نا چناتیکن مچ آ ملک انا پولیو ورکرآتا منت واری ءِ ہرفیوہ و 2023اٹی دین انا تالانی ءِ توننگ کن حکومت نا عزم انا درشانی ءِکیوہ۔ اوپارے کہ پاکستان پولیو پروگرام باسنی ٹی پولیوورکرآتے مروک آ نسخان تا اسہ جوان ءُ جاچ اس ہلکوسس، بھسکار پِر و نوکاپ آن 33 ملین بندغ زہمی مسوسر، مالی امداد ہمو کارندہ غاتیکن ءِ ہرافتا اُرا یا تو نوکاپ درے یا جزوی وڑاٹ نسخان رسینگا، پروگرام نا جاچ انا رداٹ کم وو د 12،500 پولیو ہیلتھ ورکرنوکاپ آن زہمی مسر۔ اوپارے کہ پولیو ورکرآک ہروارآنبار تینا ڈیوٹی آن زیات پاکستان نا خذمت ءِ کرینو وننے داہیت ءِ پک کننگے کہ زہمی خاہوت آتے داامداد زوت آن زوت ملے، ساڑی وخت اٹی ترند یخ انا حالیت آتیٹی اوفتا اُرا تا پوسکن تفنگ اٹ اوفتے تون تفنگ بھاز المی ءِ۔ داوخت آ کوآرڈینیٹر قومی ایمرجنسی آپریشنز سینٹر ڈاکٹر شہزادبیگ پارے کہ ننا اولیکو اولیت مدام فرنٹ لائن ورکرآک ءُ، موسمیاتی بھسکاری آن دوچار مننگ آن پد ہم پولیو نا عملہ ہیلتھ کیمپ آتا کمک اٹ المی جان جوڑی آسراتی تا فراوانی ٹی غٹ آن مون اٹی ئسر ہراکہ اوفتا بھلا عزم انا عکاسی ءِ کیک۔ اومستی پارے کہ بحالی نا سرجزآتا اسہ بشخ اسے نا وڑاٹ حکومت نا کنڈآن پولیوورکرآتے اولیت تننگ داپروگرام کن و فرنٹ لائن ورکرآتا است بڈی کن ہم بھاز اہم ءِ۔ مچ آملک اٹی نوکاپ آن زہمی فرنٹ لائن پولیوورکرآتے جم وڑاٹ 2501 ملین روپئی تننگک۔
