این ڈی ایم اے نا کورونا حالیت آتا بارواٹی جاچ دیوان، چیئرمین نا آگاہی مہم اس بناکننگ و مسافر آتا چاروکی ءِ برقرار تخنگ نا پارت

اسلام آباد۔ 02 جنوری (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) کورونا دین آن بچفنگ کن آگاہی مہم اسے نا بناءِ کننگ و مسافر آتا چاروکی ءِ برقرار تخنگ نا پارت کرینے۔ کورونا دین انا پوسکن آ ویرینٹ بی ایف۔7 آن ودی مروک آ ممکنہ خطرہ نا رداٹ کورونا حالیت و بالی پٹ آتیا چاروکی نا بابت دوشنبےنادے آ قومی ادارہ جان جوڑی (این آئی ایچ) و سول ایوی ایشن اتھارٹی (سی اے اے ) نا ٹیم اتون چیئرمین این ڈی ایم اے لیفٹیننٹ جنرل انعام حیدر ملک انا کماشی ٹی جاچ دیوان اس اڈہلک۔ قومی ادارہ جان جوعڑی حوال اٹی پاکستان اٹی کورونا مینجمنٹ و ویکسی نیشن ایڈمنسٹریشن ڈیٹا نا حساب وکتاب آن معلومدار کرسا پارے کہ رائج پالیسی نا رداٹ ملک انا غٹ بالی پٹ آتیا پیشن نا ملک آتیان بروک آ مسافر آتا رپیڈ اینٹیجن ٹیسٹ و پولیمریز چین ری ایکشن ٹیسٹ کننگ انگ ءِ ۔ این آئی ایچ کمامدارآک پاریر کہ طورخم بارڈرآ سیم پار کروک آ بندغ آتا ویکسی نیشن و سکریننگ ہڑدے ئی بنداو آ کننگ انگ ءِ۔ دیوان اٹی سول ایوی ایشن اتھارٹی پارے کہ غٹ بالی پٹ آتیا انتظامی ٹیم مامور کننگ تون گچین سکریننگ نظام پورو وڑاٹ فعال ءِ و کورونا دین اتون مون تننگ کن المی بست وبند آتے پورو کننگانے۔ چیئرمین این ڈی ایم اے ملک انا انسداد کورونا حکمت عملی و قومی تیاری آ است جمی نا درشانی ءِ کرے و این آئی ایچ ءِ پارت کرے کہ او تعلیمی ادارہ، راجی مچی و کمیونٹی تیکن احتیاطی تدابیر جاری کے والس و کمکار ادارہ گاتے معلومدار تخنگ کن ہفتہ وار میڈیا بریفنگ کے۔ اوکورونا دین انا پوسکن آ ویرینٹ نا ایلو ملک آتیٹی تالانی و چندی ملک آتیٹی داڑتون مون تننگ کن کروک آ گام گیج آتا پدریسہ چاروکی آ زور شاغا۔