پشاور۔ 02 جنوری (اے پی پی) بنجائی وزیر سمندر پار پاکستانی و افرادی قوت ساجد حسن طوری پارے کہ بے روزگار بندغ آتے کسبکار جوڑ کرسا پوسکن آ خواست آتون ہم گرنچ کننگ المی ءِ ، دا رداٹ وزارت چندی پروگرام درستی راستی کرفنگ ءِ ہرافتا است بڈ بھرم دوئی مننگ ءِ۔ داخیال آتا درشانی ءِ او گورنمنٹ ٹیکنیکل اینڈ ووکیشنل سینٹر حیات آباد اٹی ہیلکاری پروگرام نا بشخ ہلوک آتیٹی سرٹیفکیٹ بشخنگ نا بابت اڈ ہلوک دود آن تران کرسا کرے۔ اوپارے کہ پاکستانی قوم خاص وڑاٹ زالبول آتے کسبکار جوڑ کننگ پاکستان پیپلزپارٹی نا منشور نا بشخ اسے، شہید بینظیر بھٹو مچ آ زند ءِ پاکستان اٹی ویمن امپاورمنٹ کن متحرک ئسک و داسہ آصف علی زرداری و بلاول بھٹو ہم شہید بی بی نا فکر ءِ مون آ تخسا دا بابت تینا کڑد ءِ ادا کننگ اٹی ءُ۔ اوپارے کہ تینا پارٹی سرکڑدہ غاتا پارت آتیا عمل کرسا اوتینا وزارت نارداٹ پاکستان اٹی کسبکار افرادی قوت نا مون آ دننگ خاص وڑاٹ زالبول آتے زیات آن زیات کچ اٹی کسبکار جوڑ کننگ آ خاص چکار تخانے و کسبکار پاکستانی تے زیات آن زیات کچ اٹی پیشن نا ملک روزگار ترفنگ کن ہم نمان و عملی گام گیج کننگ انگ ءِ، دا وخت آ خاص وڑاٹ قبائلی ضلع غاتا زالبول آتا کسبکاری آ خاص چکار کننگانے انتئے کہ دا علاقہ داتم اسکان شونداری نا عمل اٹی بھاز پدی ءِ۔ اوپارے کہ قبائلی زالبول آک بے پناہ لائخی تخرہ ہرافتے مون آ اتسا دا زالبول آتے نئے بیرہ تینا خاہوت نا کفالت اٹ بشخ شاغنگ نا قابل جوڑ کننگ مریک بلکن اوفتے ملک انا جم زرگزرانی شونداری ٹی ہم پبی کڑد ادا کننگ قابل کننگ مریک۔ دود آن پی پی پی شعبہ زالبول نا صوبائی صدر سینیٹر روبینہ خالد و ایلو ترانکار آک ہم تران کریر۔ داوخت آ بنجائی وزیر تربیت پورو کروک آ زالبول آتیٹی سرٹیفکیٹ و ٹول کٹ ہم بشخا۔
