اسلام آباد۔ 02 جنوری (اے پی پی) صدر مملکت ڈاکٹر عارف علوی چندی واقعہ غاتیٹی شہید مروک آ پاک فوج انا ورناتا وارث آتون ٹیل فون آ ہڑزخواہی کرے، اوپارے کہ لمہ وطن ءِ دہشت گردی نا لعنت آن پاک کننگ کن شہید آتا قربانیک زیان مفسہ۔ دوشنبےنادے آ ایوان صدر نا پریس ونگ انا رداٹ صدر مملکت چندی واقعہ غاتیٹی شہید مروک آ پاک فوج انا ورناتا وارث آتون ٹیل فون آ ہڑزخواہی کرے۔ صدر 31 دسمبر آ جانی خیل بنوں ٹی شہید مروک آ سپاہی محمد وسیم نا باوہ تون فون آ است ہسونی نا درشانی ءِ کرے، شہید انا باوہ صدر مملکت ءِ پارے کہ مسہ مار فوج اٹی ءُ و قربانی کن تیار ءُ۔ صدر ڈاکٹر عارف علوی وطن کن شہید انا قربانی وباوہ نا جوزہ ءِ حب الوطنی نا ستاءِ کرے۔ صدر مملکت 29 دسمبر آ کرم ایجنسی ٹی شہید مروک آ صوبیدار شجاع محمد نا ایلم محمد اشرف تون ہیت کرے، صدر تون گپ وتران اٹی شہید اناایلم محمد اشرف پارے کہ لمہ تینا شہید مار آ گمر کیک، نن ہم قربان مننگ کن تیار اُن۔ صدر مملکت سپاہی عبدالرحمان نا ایلم گوہر یاسین تون ٹیل فون آ رابطہ کرے، شہید نا ایلم صدر مملکت تون گپ وتران کرسا پارے کہ نن غٹ پاکستان آ قربان ، دہ ایلم ہم مروسر تو شہیدی کن تیار مسرہ۔ صدر مملکت نائیک محمد رمضان نا اِلہ تون ہم ٹیل فون آ گپ وتران کرے و شہید نا درجہ غاتا بڑزی کن دعا کرے۔ صدر ڈاکٹر عارف علوی پارے کہ لمہ وطن ءِ دہشت گردی نا لعنت آن پاک کننگ کن شہید آتا قربانیک زیان مفسہ۔ اوشہیدآتے خراج عقیدت پیش کرے ، وارث آتون ہمدردی و صبر و جمیل کن دعاکرے۔
