اقوام متحدہ۔ 02 جنوری (اے پی پی) پاکستان پارینے کہ بھارت تینا غیرکانودی کوزہ ٹی جموں وکشمیر اٹی مسلم گیشتری ءِ اقلیت اٹ بد کننگ کن اسرائیلی ماڈل آ عمل کننگ ءِ، ہندا سوب ءِ کہ او اقوام متحدہ نا جنرل اسمبلی ٹی فلسطین آ اسرائیل نا غیرکانودی کوزہ نا برخلاف جہانی عدالت انصاف آن کانودی سلاہ خواہنگ نا قرارداد آ رائے شماری ٹی بشخ ہلتو۔ داہیت ءِ اقوام متحدہ ٹی پاکستان ناآخبتی مندوب منیر اکرم پاکستان نا قومی خبررساں ادارہ ’’اے پی پی‘‘ ءِ تروک آ اسہ انٹرویو اسے ٹی پارے۔ اوپارے کہ بھارت نا کنڈآن قرارداد اٹی رائے شماری ٹی بشخ ہلپننگ جموں وکشمیر آ کوزہ نا بھارتی پالیسی، کشمیری تا ڈغار تیا کوزہ، آبادیاتی بدلی و حق خودارادیت آن انکار نا ڈیک ءِ ایتک۔ سرائیلی کوزہ نا ویل آ جنرل اسمبلی آئی سی جے آن سلابتی سلاہ بٹنگا۔ اونا پاننگ ئس کہ فلسطین اٹی اسرائیلی ڈوہ بھارت نا غیرکانودی کوزہ ٹی جموں وکشمیر اٹی بھارت نا ڈوہ ءِ ہم پک کیک۔ قرارداد اٹی اقوام متحدہ نا سیکرٹری جنرل آن خواست کننگاکہ او اینخو سال ستمبر اٹی اقوام متحدہ نا جنرل اسمبلی ٹی قرارداد آ عملدرآمد نا بابت رپورٹ پیش کے۔ سفارت کار پارے کہ بھارت نا کنڈآن اقوام متحدہ نا جنرل اسمبلی ٹی فلسطینی علاقہ غاتیا اسرائیل ناغیرکانودی کوزہ نا کانودی نتیجہ غاتا بارواٹی جہانی عدالت انصاف (آئی سی جے) آن سلاہ خواہنگ نا قرارداد اٹی رائے شماری ٹی بشخ ہلپننگ بھارت نا غیرکانودی کوزہ ٹی جموں وکشمیر اٹی آبادیاتی انجینئرنگ نا اسرائیلی ماڈل ءِ مون آ دننگ نا نئی دہلی نا مہم نا عکاسی ءِ کیک ہرانا مسخت جموں وکشمیر نا مسلم گیشتری والا علاقہ ءِ اقلیت اٹ بدل کننگ ءِ۔ اونا پاننگ ئس کہ جنرل اسمبلی ٹی فلسطین اسرائیل جھیڑہ غا جہانی عدالت انصاف آن کانودی سلاہ خواہنگ نا حق اٹی قرارداد ءِ گیشتری سلاہ اٹ منظور کننگا، قرارداد نا حق اٹی 87 و مخالفت اٹی 26 وونٹ تما وخت اس کہ 53 ملک آک رائے شماری ٹی بشخ ہلتور۔ قرارداد نا حق اٹی وونٹ تروک آ ملک آتیٹی چین، روس، پاکستان ، متحدہ عرب امارات ، و ایلو مسلمان ملک آک اوار ءُ، اسرائیل، امریکہ، برطانیہ و ایلو یورپی ملک آک قرارداد نا مخالفت ءِ کریر وخت اس کہ بھارت و جاپان تون اوار 53 ملک آک رائے شماری ٹی بشخ ہلتور۔ اقوام متحدہ ٹی فلسطین نا آخبتی مبصر ریاض منصور قراردا د نا مخ تفی ءِ کروک آ ہمو ملک آتا ستاءِ کرے ہرافک دھڑکو و زور آن پد ہم مخ تفی ٹی وونٹ تسر۔
