لاہور۔ 01 جنوری (اے پی پی) بنجائی وزیر اقتصادی امور سردار ایاز صادق پارینے کہ عمران خان تون بروک آ گچین کاری تیٹی کس اس سیبو مفک، پرویز الٰہی وعمران خان نا وکیل جوڑ ءِ، پی ڈی ایم نا حکومت عمران خان نا خارانا سوب آن جوڑ مس۔ لس گچین کاریک وخت آ مریرہ، الس ءِ کبینی نا مین آن کشنہ۔ داخیال آتا درشانی ءِ او یک شنبےنادے آ داڑے اسہ دود اسے آن تران و میڈیا تون گپ وتران کرسا کرے۔ سردار ایا ز صادق پارے کہ عمران خان نا چار سالہ کارکڑد کس اسے آن ڈکھوک اف، پی ٹی آئی تینا دور اٹی داخہ در وام ہلک ہراخہ در تدوک آ 70 سال اٹی ہلنگتنے، عمران خان دا وام تے اٹ ہچ ءُ میگاپروجیکٹ اسے نا بناءِ کتو بلکن پاکستان ءِ شونداری نا بڑزی تسکان سرکروک آ ڈٹ سی پیک ءِ ہم بند کننگا۔ اوپارے کہ عمران خان نا دروغ کرار کرار آ پاش مرسا الس نا مون آبسنے۔ بیروزگار ورناتے اسہ کروڑ نوکری و بے اُرا بندغ آتے پنجا لکھ اُرا تننگ نا قول دروغ پک مسنے، وعمران خان ادارہ غاتے بدنام کننگ کن سازش نا راگ اس کرے، عمران خان تینا دور حکومت اٹی ہر ہمو بندغ آن بیر ہلک ہرااونا برخلاف ہیت اس کرے۔ اوپارے کہ وعمران خان نا دور اٹی مسلم لیگ ن آ بھاز مشکل ءُ وخت اس ئس ولے اسہ ہم کارندہ اس مسلم لیگ ن آن پنسا پی ٹی آئی ٹی اوار متو۔ عمران خان اسہ محسن کش ءُ انسان اسے، جنرل (ر) باجوہ، جہانگیرترین وعلیم خان اوڑا بے کچ احسان کریر ولے عمران خان تینا سنگت آتا ہم وفادار متو، عمران خان جہانگیر ترین و علیم خان نا خاہوت ءِ ہم بے بنداو مقدمہ غاتیٹی اوار کرے۔
