اسلام آباد۔ 01 جنوری (اے پی پی) وزیراعظم نا خصوصی کمکار تخفیف نیزگاری و راجی رکھ فیصل کریم کنڈی اینخو سال انا بناٹی بینظیر انکم سپورٹ پروگرام (بی آئی ایس پی ) نا رداٹ ’’ پوسکن ءُ سروے‘‘ اسے نا بناءِ کننگ نا پڑو کرینے۔ یک شنبےنادے آ جاری مروک آ اسہ ویڈیو کلہو اسے ٹی وزیراعظم نا خصوصی کمکار پوسکن آ سال انا وخت آ قوم ءِ مبارکبادی ترسا پارے کہ تدوک آ سال پاکستان ءِ کورونا و نوکاپ نا سوب آن بھاز نسخان ہرفوئی تما ولے نن گراس روٹ لیول آ حقدار مخلوق ءِ زیات آن زیات آسراتی فراوان کننگ نا ہرممکن کوشست کننگ اُن۔ اوپارے کہ داسال خواجہ سرا تے بینظیر کفالت پروگرام اٹی اوار کننگ انگ ءِ ہرا دا پسماندہ کمیٹی نا مالی آجوئی ءِ پک کننگ نا کنڈا اسہ گچین ءُ گام اسے۔ اوپارے کہ سال انا بناٹی بی آئی ایس پی نا پنچ لکھ ہشتاد ہزار حقدار کفالت پروگرام نا پوسکن آ قسط ءِ دوئی کننگ کن ہِننگ ءُ وخت اس کہ دا حقدار آتا چناتا تعلیمی وظیفہ ہم سرکننگک۔ اوپارے کہ نن بحیثیت قوم قدرتی موسم و مشکل وخت اٹی مدام دوتے ملفین و سیوت اٹ غٹ چیلنج آتا مقابلہ ءِ کرین۔ اواومیت ظاہرکرے کہ مہالو آنبار داسال ہم قوم اسہ پوسکن ءُ جوزہ و اومیت اسے تون مون آ بریک۔
