اسلام آباد۔ 01 جنوری (اے پی پی) بنجائی وزیر جان جوڑی عبدالقادر پٹیل مچ آ قوم ءِ پوسکن آ سال آ مبارکبادی ترسا پارینے کہ 2023مچ آ قوم و ملک اکن خوشی تا سال مریک، نوکاپ زہمی تا بحالی کن 2023 اٹی پبی گام گیج کینہ، 2023اٹی ہم ہیلتھ انا بشخ اٹی شونداری کن پین مربوط گام گیج کننگک۔ یک شنبے نادے آ تینا بیان اٹی بنجائی وزیر پارے کہ مچ آقوم ءِ 2023 نا پوسکن آ سال مبارک مرے، نوکاپ زہمی تیکن دعا ءِ کہ 2023 اوفتے کن دن و نن خوشی اتے، دعا ءِ کہ نوکاپ زہمی تا مشکل آک آسان مریر، نوکاپ زہمی تا امداد کن قوم وخت اس ہم لاپرواہ مف، نوکاپ زہمی تا بحالی کن 2023 اٹی پبی گام گیج کینہ۔ اوپارے کہ 2022 اٹی مچ آ ملک بدترین نوکاپ بس ہراڑان زیات جانی و مالی نسخان مس، 2022 آن ہیلتھ انا بشخ اٹی اصلاحات نا چرجوئی برجاءِ۔ اوپارے کہ 2023 اٹی ہم ہیلتھ انا بشخ اٹی شونداری کن پین مربوط گام گیج کننگک، تدوک آ سال اٹی پی ایم سی ایم ٹی آئی و پاکستان نرسنگ کونسل نا کانود پاس مس، میڈیکل ایجوکیشن نا گچینی کن پبی گام گیج آتا چرجوئی برجاءِ، میڈیکل ایجوکیشن و ہیلتھ انا بشخ اٹی شونداری کننگ آن بیدس راج شون ہلنگ کپک۔ عبدالقادر پٹیل پارے کہ پاکستان نرسنگ کونسل نا گچینی کن پگی گام گیج کننگ انگ ءِ، نرسنگ نا بشخ جان جوڑی نا بشخ اٹی تمبہ نا حیثیت تخک، جان جوڑی نا بشخ اٹی مروک آ اصلاحات نا اثرآک 2023اٹی نمان مون آ بریرہ، ہسپتال آتا کارکڑد ءِ پین گچین کننگ کن گچین گام گیج آتے پک کینہ۔ بنجائی وزیر پارے کہ الس ءِ ناجوڑی و دین تیان رکھ تخنگ کن مربوط حکمت نارداٹ کاریم کننگ انگ ءِ، بارڈاینڈ ہیلتھ سروسز پاکستان نا ادارہ ءِ سوگو کننگ کن پبی گام گیج کرینے، اخہ در داادارہ ءِ سوگو کینہ الس ءِ ناجوڑی تیان رکھ تخنگ اٹ اہم کڑد ادا کیک۔ اوپارے کہ ملک انا غٹ انٹری پوائنٹ آتے سوگو کننگ انگ ءِ، جان جوڑی نا بشخ اٹی الس ءِ ریلیف فراوان کننگ کن دے و نن کوشست کننگ اُن۔
