صدر مملکت ڈاکٹر عارف علوی سال 2023 نا بناآ مچ آ پاکستانی قوم و جہانی برادری ءِ مبارکبادی پیش کرسا پارینے کہ پوسکن آ سال انا بناآ ای اللہ تعالیٰ نا حضور دعا کیوہ کہ او دا سال ءِ پاکستان، پاکستانی قوم، عالم اسلام و مچ آ دنیاکن رحمت و برکت آتا سوب جوڑ کےو دنیا ءِ امن و آشتی و شونداری و شونہالی نصیب کے۔ ایوان صدر میڈیا ونگ انا کنڈآن ہفتہ نادے آ جاری بیان اٹی صدر مملکت ڈاکٹر عارف علوی پارے کہ تدوک آ سال پاکستانی قوم ءِ چندی چیلنج مون تروک ئس، ولے نن تینا خواری، نرزوری، ایثار، عزم و مستقل مزاجی نا سوب آن مشکل حالیت آتیان پیش تمان۔ اوپارے کہ کورونا نا دین انا سرسہبی اٹ مون ءِ توننگ آن پد پاکستان ءِ ملک انا طول و عرض اٹی تاریخی نوکاپ تون ہم مون تروئی تما۔ صدر مملکت پارے کہ نوکاپ زدہ علاقہ غاتا دورہ ءِ کننگ و ہموڑے مروک آ نسخان تا جاچ ءِ ہلنگ نا موقع ملا، ای مشکل اٹی تموک پاکستانی الس تون ملاٹ و اوفتا ویل آتے بنگٹ، نوکاپ اٹی ہراڑے کنے چندی ویل ، نسخان و نوکاپ نا بھسکاری ہُننگ کن ملا، ہموڑے ای تینا قوم انا ثابت گامی ، ایثار، حب الوطنی، یکجہتی ، عزم و استقلال ءِ ہم خناٹ۔ صدر ڈاکٹر عارف علوی مستی پارے کہ پاکستان ءِ ویل آتیان کشنگ و شونداری نا کنڈا دننگ کن ننے تینا ہمولائخی تے کاریم اٹ اتنگ نا گرج ءِ۔ پاکستان ءِ اینو چندی زرگزرانی مشکل، سیاسی نزوری، امن و ایمنی نا حالیت، دہشت گردی نا دُوارہ کاٹم ہرفوک عفریت، موسمیاتی بدلی ، نیزگاری و ودوک آ آبادی کون آ چیلنج مون تروک ءِ۔ اوپارے کہ پوسکن آ سال اٹی ننے قوم ءِ مون تروک دا ویل آتا مون ءِ توننگ کن بحیثیت قوم تینا اولیت آتا سہی وڑاٹ تعین ءِ کننگ ءِ۔ ننے ملک ءِ اسہ شونہال، شون ہلوک، جمہوری و سوگو ملک اس جوڑ کننگ کن قومی یکجہتی، سیوت، نظم وضبط، پدریسہ خواری، جوزہ ولگن تون کاریم کروئی ءِ۔ صدر مملکت پارے کہ پوسکن آ سال دا ہیت انا خواہندار ءِ کہ نن اسہ سوگو و محکم پاکستان کن جمہوری ادارہ غاتا فعالیت، اثرانگیزی وکارکڑد ٹی ودکی ءِ پک کین، ننے تینا ادارہ غاتا کارکڑد اٹی ودکی کن تعلقدار کانود و قاعدہ وضابطہ ٹی اصلاحات درستی راستی کرفنگ نا گرج ءِ۔ ڈاکٹر عارف علوی مستی پارے کہ ملکی شونداری کن دا سال غٹ اسٹیک ہولڈر آتے آئین نا پاسداری، انصاف نا فراوانی، شفافیت، کارکڑد اٹی ودکی، میرٹ نا پابندی والسی غاوتا وخت آ ازالہ ءِ پک کننگ کن عملی گام گیج ہلوئی مریک۔ داکان بیدس نوکاپ زہمی تا پورو بحالی و راج انا نزور تپہ غاتے نیزگاری آن کشنگ کن تینا کوشست آتے ترند کروئی مریک۔ اوپارے کہ اسہ جوان راج اسے نا ٹہیفنگ خصوصی بندغ و زالبول آتا راج و کاروباری و راجی سرجزآتیٹی اوار مننگ آن بیدس ممکن اف، ننے تینا قدرتی وسیلہ و توانائی نا زموارانہ کاریم اٹ اتنگ نا عادت ءِ تینا کروئی مریک و ننے انسانی وسیلہ غاتا شونداری، تعلیم و تربیت آ خاص چکار کننگ نا گرج ءِ۔ تینا تہنیتی کلہو نا ایسر اٹی صدر مملکت پارے کہ ببو، پوسکن آ سال انا بناآ پاکستان ءِ اسہ پرامن، شونہال و اسلام نا زریں جمہوری اصول آتیا تالان اسہ اسلامی آسودہی ریاست اس جوڑ کنگ نا کنڈا سفر نا بنا ءِ کننگ نا قول کین۔ اواللہ تعالیٰ آن دعا کرے کہ او دامسخت آتا دوئی کننگ اٹ ننا حامی و ناصر مرے و سال 2023 ءِ پاکستان کن شونداری، شونہالی ، سوگوی و امن و ایمنی نا سال اس کے۔
