بنجائی وزیر جان جوڑی تون چیئرمین ہائیر ایجوکیشن کمیشن نا اوڑدہی ، میڈیکل نا تعلیم ءِ جہانی آب انا رداٹ کننگ کن پکا عزم انا درشان ، ترجمان وزارت  جان جوڑی

اسلام آباد۔ 31 دسمبر (اے پی پی) بنجائی وزیر جا ن جوڑی عبدالقادر پٹیل تون چیئرمین ہائیر ایجوکیشن کمیشن (ایچ ای سی ) اوڑدہی کرینے۔ ترجمان وزارت جان جوڑی نا رداٹ اوڑدہی ٹی میڈیکل نا تعلیم ءِ جہانی آب انا رداٹ کننگ کن پکا عزم انا درشانی ءِ کننگا۔ بنجائی وزیر جان جوڑی عبدالقادر پٹیل داوخت آ پارے کہ شہید ذوالفقار علی بھٹو یونیورسٹی اسلام آباد اٹی بڑزکو کہول انا یونیورسٹی اسے۔ یونیورسٹی منہ سال اٹی نمان ہند اس دوئی کرینے۔ اومستی پارے کہ تدوک آ اِراسال اٹی یونیورسٹی دہ پوسکن ءُ پروگرام تا بناءِ کرینے وخت اس کہ یونیورسٹی نا جم وڑاٹ 45 نا خڑک چندی پروگرام چلینگ انگ ءُ۔ عبدالقادر پٹیل پارے کہ یونیورسٹی بیسک سائنس اٹی ایم فل و پی ایچ ڈی پروگرام  نا ہم بناءِ کرینے۔ اوپارے کہ ایچ ای سی نا سپورٹ نا خصوصی وڑاٹ منت وارا ُن۔ بنجائی وزیر پارے کہ یونیورسٹی نا ودکی کن ڈغار ہم درکار ءِ تانکہ ایلو بھلا پروگرام تا بناءِ کننگ مرے۔ یونیورسٹی نا ڈغار کن این آئی ایچ آن ڈغار دوئی کننگک۔ عبدالقادر پٹیل پارے کہ ایچ ای سی ننے کلینکل سائنسز اٹی بڑزکو تعلیم نا آب ءِ بڑز کننگ کن سپورٹ فراوان کے۔ اوڑدہی ٹی چیئرمین ایچ ای سی بڑزکو تعلیم نا آب ءِ گچین کننگ کن ہروڑنا پبی کمکاری نا باوری کرفے۔