لاہور۔ 31 دسمبر (اے پی پی) بنجائی وزیر شونداری و ڈٹ بندی احسن اقبال پارینے کہ ملکی فائدہ و سالمیت کن ننے جندی فائدہ غاتیان ایڑتر مرسا سجفوئی مریک، ملکی زرگزران ءِ بحال کننگ نا چیلنج ءِ امنا کرین، سیاسی فیصلہ کتون، ٹیکنوکریٹ نا حکومت نا آئین اٹی ہچ ءُ وجود اس اف، ساڑی آ حکومت ملکی زرگزران ءِ بحال کننگ کن کوشست کننگ ءِ، پاکستان زوت تنکی تیان پیش تمک۔ عمران خان حکومت نا غلط گام گیج آتا سوب آن دہشت گردی دُوارہ کاٹم ہرفنگ ءِ۔ داخیال آتا درشانی ءِ او ہفتہ نادے آ داڑے ماڈل ٹاؤن اٹی پریس کانفرنس آن تران کرسا کرے۔ احسن اقبال پارے کہ عمران خان سہب وشام پاکستان نا الس اٹی مایوسی تالان کننگ اٹی ءِ، وخت اس پاہک کہ پاکستان ڈیفالٹ مریک و وخت اس آئی ایم ایف نا پروگرام ءِ ٹارگٹ کننگ اٹی ءِ، عمران خان اگہ پاکستان نا جوڑ کننگ اٹ بشخ ہلنگ کپک تو کم از کم تینا زبان ءِ بند کے و ساڑی حکومت ءِ پاکستان نا زرگزران نا بحالی نا بابت کوشست آتے برجاتخنگ کن ہلے۔ اوپارے کہ پاکستان زوت دا تنکی تیان پیش تمک، پاکستان تون ننا وجود و ننا شناخت ءِ، نن دادے ہچ ءُ نہاد اسے آ ڈیفالٹ مننگ کن اِلیپنہ و اسہ بندغ اسے نا ضد انا گواچی مننگ کن الیپنہ۔ احسن اقبال پارے کہ اسہ ملک اس ہم پاکستان نا زرگزران نا بابت گڑتی تا درشانی ءِ کتنے۔ داتسکان کہ ننا ہمسایہ دشمن ملک انا میڈیا ہم پاکستان نا ڈیفالٹ مننگ نا بارواٹی ہچ ءُ ہیت اس کتنے۔ احسن اقبال پارے کہ عمران خان حکومت اٹ بننگ تون زرگزران ءِ اسہ ٹک ہفت و و ولدا منفی ٹی خسا، چار سال اٹی زرگزرانی حالیت آتے بھس کرسا وام تیٹی بٹے۔ اوپارے کہ ملکی تاریخ نا ہشتاد درسد وام تے پی ٹی آئی ہلک، اول ہفدہ سد ارب روپئی پاکستان نا بھاریم ئسک، داسہ پنچ ہزار ارب روپئی اسکان سرمسنے ہراٹی مسہ ہنداخہ ودکی پی ٹی آئی کرے۔ پی ٹی آئی ڈیفالٹ نا شوشہ غا ہائبرڈ وار نا بناءِ کرینے، اوپارے کہ عمران خان اگہ پاکستان نا جوڑ کننگ اٹ بشخ ہلنگ کپک تو کم ازکم تینا باہ ءِ بند کے و ساڑی حکومت ءِ پاکستان نا زرگزران نا بحالی نا بابت کوشست آتے برجاتخنگ کن ہلے، اوننے آخا پاکستان ءِ ٹارگٹ کننگ اٹی ءِ، عمران خان آئی ایم ایف پروگرام ءِ ٹارگٹ کننگ اٹی ءِ، پیشن نا امداد ءِ توننگ کن جہانی کہول آ مہم چلیفنگ انگ ءِ کہ پاکستان نا کمک ءِ کننگپ۔
