اسلام آبا۔ 31 دسمبر (اے پی پی) اسپیکر قومی اسمبلی راجہ پرویز اشرف پارینے کہ شونداری و شونہالی پاکستانی قوم انا مقدر ءِ، پاکستانی قوم ساڑی آ چیلنج آتا مون ءِ توننگ کن سنبرینگوک ءِ۔ اودا پت انا درشانی ءِ کرے کہ پوسکن آ سال انا دے پاکستانی قوم اکن شونداری و شونہالی نا دے دے ٹک ایتک۔ اوشہید بینظیر بھٹو و شہید ذوالفقار علی بھٹو نا ہم آہنگی ، مفاہمت و مکالمہ نا پالیسی تے تینا کننگ نا گرج آ زور شاغسا پارے کہ شہید بینظیر بھٹو و شہید ذوالفقار علی بھٹو نا مفاہمت نا پالیسی ءِ تینا کرسا ساڑی آ چیلنج آتا مون ءِ توننگ مریک و ملک ءِ شونداری و شونہالی نا کنڈآ دننگ مریک، داخیال آتا درشانی ءِ او پوسکن آ سال انا بنانا وخت آ مبارکبادی ترسا کریر۔ اسپیکر ملک آن دہشت گردی و انتہاپسندی نا چٹفنگ کن پاکستانی سلہہ بند فوج انا لائخی تیا پت انا درشانی ءِ کرسا پارے کہ ننا نرزور سلہہ بند فوج دہشت گردی نا برخلاف برسر پیکار ءُ و داناسور نا مون ءِ توننگ کن اوفتے قومی یکجہتی تا گرج ءِ۔ اوپارے کہ الس ءِ دہشت گردی ، انتہاپسندی و کبینی کون آ بھلو چیلنج مون تروک ءِ ، و السی نمائندہ مننگ نا ناطہ دا زمواری سیاستدان تیا بیٹ مریک کہ او قوم ءِ مون تروک ویل آتا ایسری کن تینا کڑد ءِ ادا کیر۔ او سیاست دان تیا سیاسی وابستگی تیان ایڑتر مرسا سیاست اٹی رواداری ، مہرومریبت و مکالمیہ ءِ مون آ دننگ نا گرج آ زور شاغا۔ اوپارے کہ قوم عزت نفس ، عزم، مستقل مزاجی، سگ و جہد پدریسہ ءِ زند و راج اٹی روشنا اصول آتا وڑاٹ تینا کرسا دا چیلنج آتا مون ءِ توننگ کیرہ۔ اوپارے کہ عظیم قومک تینا مستین آن سبخ ہلیرہ۔ اوشاعر مشرق علامہ محمد اقبال نا شئیر ’’یقین محکم عمل پیہم محبت فاتح عالم ‘‘ نا حوالہ ءِ ترسا پارے کہ علامہ اقبال نا فلسفہ خودی، مہرومریبت و رواداری نا اصول آتے تینا کرسا ملک و قوم ءِ چیلنج آتیان کشنگ مریک۔ اسپیکر پارے کہ پاکستان نا تاریخ اٹی اولیکووار ڈائمنڈ جوبلی دود آتا وخت آ پارلیمنٹ نا درگہ الس کن ملنگا ہراٹی زالبول ، چنا و پدسلوک تپہ، ورنا، اقلیتی برادری آن تعلق تخوک آ بندغ و ٹرانس جینڈر آن بیدس مسکوہی و ساڑی پارلیمنٹ نا باسک آک بشخ ہلکر۔ اوپارے کہ دا اولیکو موقع ئسک ہراتم خاکروب، خواجہ سرا وچنکا چناک ایوان اٹی تقریر کریر و گچین السی نمائندہ غاتیان سوج اَریفیر۔ اوپارے کہ ساڑی آ پارلیمنٹ ملک اکن موسمیاتی انصاف نا مقدمہ تون مون تننگ اٹ اہم ءُ کڑد اس ادا کرے ولس مخلوق کن کانود سازی کن سرگرم ئس۔ اسپیکر داعزم انا درشانی ءِ کرے کہ ساڑی آ پارلیمنٹ چیلنج آتا ایسری آ چکار تخک و ملک و قوم ءِ تنکی تیان کشنگ کن ہرممکن وسیلہ غاتے کاریم اٹ اتیک۔ اواللہ تعالیٰ آن دعا کرے کہ پوسکن آ سال پاکستانی قوم اکن شونداری و شونہالی ، امن و سوگوی نا سال جوڑ مرے۔ ڈپٹی اسپیکر زاہد اکرم درانی ہم پوسکن آ سال انا بننگ آ قوم ءِ مبارکبادی تس و دااومیت نا درشانی ءِ کرے کہ پوسکن آ سال قوم اکن خوشی اتیک و شونداری و شونہالی نا سال جوڑ مریک۔ اودایخین نا درشانی ءِ کرے کہ 2023 نئے بیرہ پاکستان بلکن مچ آ عالم اسلام اٹ امن، سوگوی و ہم گرنچی نا سال جوڑ مریک۔ اوملکی شونداری کن قومی یکجہتی و سیوت نا گرج آ زور شاغا۔
